کولکاتا عصمت دری اور قتل معاملہ: آر جی کر میڈیکل کالج کے سابق پرنسپل سندیپ گھوش کے خلاف مقدمہ درج

کولکاتا میں خاتون ٹرینی ڈاکٹر کی عصمت دری اور قتل کے معاملہ پر جہاں ایک طرف پورے ملک میں مظاہروں اور ہڑتال کا سلسلہ جاری ہے وہیں دوسری طرف سی بی آئی اس واقعہ کی جانچ میں لگی ہوئی ہے۔ گزشتہ 4 دنوں سے سی بی آئی کی ٹیم آر جی کر میڈیکل کالج اسپتال کے سابق پرنسپل سندیپ گھوش سے پوچھ تاچھ کر رہی ہے۔ اس درمیان کولکاتا پولیس نے سندیپ گھوش اور دیگر افراد کے خلاف آئی پی سی کی دفعہ 420 کے ساتھ دفعہ 120 بی اور انسداد بدعنوانی قانون 1988 کی دفعہ 7 کے تحت معاملہ درج کیا ہے۔ ذرائع کے مطابق واقعہ کے دن آبروریزی کی شکار متاثرہ کا نام اور پہچان عوامی کرنے کے الزام میں سندیپ گھوش کے خلاف ایف آئی آر درج کی گئی ہے۔

سندیپ گھوش پر بدعنوانی کے الزام بھی لگے ہیں۔ ان کے خلاف مالی بے ضابطگی کے ساتھ ساتھ ناجائز کمیشن کے ذریعہ پیسہ وصولی کرنے اور ٹنڈرس میں ہیرا پھیری کی شکایت کی گئی ہے۔ اس سلسلے میں جانچ کے لیے ممتا حکومت نے خصوصی جانچ ٹیم تشکیل کر دی ہے جس میں سندیپ گھوش کی مدت کار کے دوران ہوئے مالی لین دین کی جانچ ہوگی۔ حکومت نے اپنے حکم میں کہا ہے کہ خصوصی جانچ ٹیم جنوری 2021 سے اب تک کی مدت میں مالی ضابطگیوں کی جانچ کرے گی۔ اس ٹیم کی قیادت آئی پی ایس افسر اور انسپکٹر جنرل آف پولیس ڈاکٹر پرنو کمار کریں گے۔ اس ٹیم میں مرشد آباد رینج کے ڈی آئی جی وقار رضا، سی آئی ڈی کے ڈی آئی جی سوما داس مترا اور کولکاتا پولیس کی ڈی سی پی اندرا مکھرجی شامل ہیں۔

سی بی آئی بھی سندیپ گھوش سے لگاتار پوچھ تاچھ کر رہی ہے اور اس سلسلے میں ان کا پالی گراف ٹسٹ کرا سکتی ہے۔ واضح ہو کہ سی بی آئی کے سوالوں کا انہوں نے تسلی بخش جواب نہیں دیا ہے۔ سی بی آئی ٹیم نے پالی گراف ٹسٹ کے لیے عمل شروع کر دیا ہے، اس کے لیے اسے عدالت سے ہری جھنڈی لینی ہوگی۔