کانپور دیہات میں دلخراش سڑک حادثہ، 6 افراد کی موت، 15 زخمی

کانپور: اترپردیش میں ضلع کانپور دیہات کے بھوگنی پور علاقے میں آج صبح ایک تیز رفتار کوئلہ بردار ٹرالا بے قابو ہو کر پلٹ گیا، جس سے اس پر سوار خواتین اور بچوں سمیت 6 افراد کی موت ہو گئی اور 15 شدید زخمی ہوگئے ہیں۔ پولیس سپرنٹنڈنٹ کیشو کمار چودھری نے یہ اطلاع یہاں دی۔

انہوں نے بتایا کہ زخمی شیو لال نے بتایا کہ تمام افراد ضلع ہمیر پور کے رہنے والے ہیں اور دیر رات ہمیر پور کے کلولی تیر گاؤں کے گھاٹم پور کے برناو سے ایک ٹھیکیدار مزدوروں کے ساتھ سرسا گنج فیروز آباد جانے کے لئے نکلا تھا اور ٹیمپو اور ٹرک کے ذریعہ وہ بھوگنی پور تک آئے۔

اس کے بعد یہاں کوئلہ بردار ٹرالا کو انہوں نے رکوایا جو اٹاوا تک جا رہا تھا۔ کچھ مزدور آگے اور کچھ پیچھے کوئلہ بردار ٹرالا پر بیٹھ کر جا رہے تھے اور اس دوران ڈرائیور غلط ڈرائیونگ کر رہا تھا، جس کی وجہ سے متعدد بار مزدوروں نے اسے ٹو کا لیکن اس نے ایک نہ سنی اور ٹرالا بھوگنی پور کے موکھاس گاؤں کے نزدیک اچانک بے قابو ہو کر پلٹ گیا، جس کی وجہ سے چھ مزدور کی موت ہو گئی اور 15 زخمی ہوگئے۔

انہوں نے بتایا کہ حادثے کے بعد مقامی لوگوں کی مدد سے پولیس نے پھنسے ہوئے زخمی مزدوروں کو باہر نکالا اور تمام زخمیوں کو باہر نکال کر ابتدائی طبی امداد کے لئے پکھرائے کے کمیونٹی ہیلتھ سینٹر بھیج دیا گیا۔ بعد میں انہیں کانپور دیہات کے ماتی ضلع اسپتال میں ریفر کر دیا گیا۔

کئی زخمیوں کی حالت تشویشناک ہے۔ حادثے کی اطلاع موصول ہوتے ہی موقع پر سپرنٹنڈنٹ پولیس کیشیو کمارپہنچ گئے۔ انھوں نے بتایا کہ مرنے والوں میں گھاٹم پور کی چنداوتی (14) رمیش، پنکی اور ہمیر پور کی رادھا، اس کی بیٹی کومل اور چار سالہ سورج شامل ہیں۔ چودھری نے بتایا کہ زخمیوں کو علاج کے لئے ضلع صدر مقام بھیج دیا گیا ہے۔ لاشوں کو پوسٹ مارٹم کے لئے بھیج دیا گیا ہے۔ حادثے کے بعد ڈرائیور فرار ہوگیا، جس کی تلاش جاری ہے۔