دردناک حادثہ: گیس سلنڈر لیک ہونے سے گھر میں لگی آگ، ماں-بیٹے کی زندہ جل کر موت

بہار کے کیمور ضلع میں دیوالی کے موقع پر ماں-بیٹے کی جل کر موت ہو گئی۔ یہ حادثہ درگاوتی تھانہ علاقہ کے بہیرا گاؤں میں جمعرات کو صبح کے قریب 8 بجے پیش آیا۔ اطلاع ملتے ہی فائر بریگیڈ کی ٹیم نے جائے وقوع پر پہنچ کر آگ پر قابو پا لیا۔ ساتھ ہی درگاوتی تھانہ کے صدر گریش کمار سمیت پولیس ٹیم بھی موقع پر پہنچ گئی۔ حادثہ میں وفات پانے والے ماں بیٹے کی پہچان 30 سالہ کرن دیوی اور 10 سالہ بیٹے گولو کے طور پر ہوئی۔

ملی جانکاری کے مطابق متوفی خاتون کا شوہر ہریانہ میں رہ کر مزدوری کرتا ہے۔ کرن اپنے بیٹے کے ساتھ گاؤں میں رہتی ہے۔ دراصل جمعرات کو صبح وہ رسوئی گھر میں ناشتہ بنانے کے لئے گئی۔ وہاں رکھا گیس سلنڈر جو پہلے سے ہی لیک ہو رہا تھا، جس سے کرن بے خبر تھی۔ اچانک اس میں آگ لگ گئی، دیکھتے ہی دیکھتے آگ نے رسوئی گھر میں موجود ماں۔بیٹے کو اپنی زد میں لے لیا۔

پڑوس میں رہنے والوں نے اچانک ماں بیٹے کی زور زور سے چیخنے کی آواز سن کر گھر سے باہر نکل کر آئے۔ پڑوسیوں نے دیکھا کہ ماں بیٹے آگ کے شعلوں میں جل رہے ہیں۔ لوگوں نے اپنے طور پر مستعدی دکھاتے ہوئے ماں بیٹے کو آگ سے بچانے کی پوری کوشش کی لیکن آگ میں بری طرح جلنے کی وجہ سے دونوں کی موت جائے وقوع پر ہی ہو گئی۔

جائے وقوع پر پہنچی پولیس نے لاشوں کو اپنے قبضہ میں لے کر پوسٹ مارٹم کے لئے بھبھوا صدر اسپتال بھیج دیا۔ خوشیوں کے تہوار دیوالی کے موقع پر اس المناک حادثہ سے پورا گاؤں سوگوار ہو گیا۔ متوفی کے اہل خانہ کا اس حادثہ کی وجہ سے رو رو کر بُرا حال ہو گیا ہے۔