جھارکھنڈ: دھنباد میں دردناک حادثہ، ریلوے اسٹیشن پر کرنٹ لگنے سے 20 افراد جھلس گئے، 8 کی موت

ہوڑہ-نئی دہلی روٹ کے دھنباد-گومو کے درمیان نچت پور ریلوے پھاٹک پر بے حد دردناک حادثہ پیش آیا ہے۔ یہاں ہائی ٹینشن تار کی زد میں آنے سے 8 افراد زندہ جل گئے ہیں جبکہ ایک درجن سے زیادہ لوگ بری طرح جھلس گئے ہیں۔

میڈیا رپورٹس کے مطابق زندہ جلے اور جھلسے تمام لوگ ٹھیکہ مزدور ہیں۔ یہ لوگ ریلوے لائن پر پول لگا رہے تھے۔ اس دوران پول 25 ہزار وولٹ کے ہائی ٹینشن تار کے رابطہ میں آیا۔ پھر لمحہ بھر میں ہی آٹھ افراد جھلس کر زندہ جل گئے۔ دیگر تقریباً 12 افراد بری طرح زخمی ہوئے ہیں جنھیں جھلسی ہوئی حالت میں اسپتال میں داخل کرایا گیا ہے۔

اس حادثہ کے پیش آنے کے بعد کئی ٹرینوں کو الگ الگ اسٹیشنوں پر روک دیا گیا ہے۔ واقعہ کے تعلق سے جب ریلوے کی لاپروائی پر سوال اٹھایا جانے لگا تو ڈی آر ایم نے کہا کہ یہ کام بغیر کسی کی جانکاری اور اجازت کے ہو رہا تھا۔ انھوں نے کہا کہ اس معاملے کی جانچ کی جائے گی۔ ڈی آر ایم نے پورے واقعہ کی تین سطح پر جانچ کرائے جانے کی بات کہی ہے۔