بھیم آرمی کے ہزاروں کارکنان کی کانگریس میں شمولیت

نئی دہلی: کانگریس پارٹی کے 137ویں یوم تاسیس کے موقع پر آج کانگریس ہیڈ کوارٹر 24 اکبر روڈ پر ہزاروں بھیم آرمی کارکنوں نے آل انڈیا کانگریس کمیٹی اقلیتی ڈیپارٹمنٹ کے قومی صدر عمران پرتاپ گڑھی کی قیادت میں ہزاروں بھیم آرمی کارکنوں نے کانگریس پارٹی میں شمولیت اختیار کی۔

کانگریس ہیڈکوارٹر میں آج صبح سے ہی مغربی اتر پردیش کے قرب وجوار کے اضلاع کے لیڈروں اور کارکنوں کا آنا جانا شروع ہو گیا تھا۔ دیکھتے ہی دیکھتے دوپہر تک بھاری بھیڑ جمع ہو گئی۔ جبکہ طے شدہ پروگرام کے تحت دوپہر کو عمران پرتاپ گڑھی کانگریس ہیڈ کوارٹر پہنچے اور تمام لیڈروں اور کارکنوں سے ملاقات کی۔ اس موقع پر عمران پرتاپ گڑھی نے تمام لوگوں کو پارٹی کی رکنیت دلاتے ہوئے کہا کہ آج کانگریس پارٹی کی یوم تاسیس ہے اور اس شاندار دن آپ تمام لوگ کانگریس پارٹی کا حصہ بن رہے ہیں اس کے لئے آپ تمام لوگ مبارکباد کے مستحق ہیں۔

کانگریس لیڈر عمران پرتاپ گڑھی نے کہا کہ جس طرح سے آپ تمام بھیم آرمی چھوڑ کر آج کانگریس پارٹی جوائن کر رہے ہیں اور کانگریس پر اپنے اعتماد کا اظہار کر رہے ہیں۔ ملک کی سب سے سیکولر، ایماندار اور قدیم تاریخی پارٹی کا حصہ بننے جا رہے ہیں اس کے لئے میں آپ کا خیر مقدم کرتے ہیں، کچھ سیاسی پارٹیوں کے لیڈر ایک مخصوص طبقہ کے کمزور لوگوں کو نشانہ بنا رہے ہیں۔ ان کو مارنے کاٹنے کی بات کر رہے ہیں لیکن ان کے خلاف کوئی قانونی کارروائی نہیں ہو رہی اس کی ہم مذمت کرتے ہیں۔

اقلیتی محکمہ کے قومی صدر عمران پرتاپ گڑھی نے کہا کہ آج ہمارے بابائے قوم مہاتما گاندھی جن کی ساری دنیا عزت کرتی ہے، ان کو بھی بی جے پی حامی لوگ کھلے عام منچوں سے گالیاں دے رہے ہیں اور مہاتما گاندھی کے قاتل ناتھو رام گوڈسے کی باپو کو قتل کرنے کے لئے تعریف کر رہے ہیں، آج آپ لوگوں کے کانگریس میں آنے سے سونیا گاندھی، راہل گاندھی، پرینکا گاندھی کے ساتھ ساتھ ملک اور معاشرہ بھی مضبوط ہوگا۔ کیونکہ جیسا میں ہمیشہ کہتا آیا ہوں کہ اگر آپ کانگریس کے ساتھ ہیں تو ملک کے ساتھ ہیں اور آپ سے وعدہ کرتا ہوں کہ میں اور میرا اقلیتی محکمہ ہمیشہ آپ تمام کی لڑائی لڑے گی۔

اس پروگرام میں کانگریس ایس سی سیل کے نو منتخب چیئرمین راجیش للوٹھیا کو بھی عمران پرتاپ گڑھی نے مدعو کیا۔ اس موقع پر راجیش للوٹھیا نے عمران پرتاپ گڑھی کا شکریہ ادا کرتے ہوئے انہیں مبارک باد دی۔ انہوں نے کہا کہ ملک بھر میں جس طرح سے دلتوں اور اقلیتوں کو نشانہ بنایا جا رہا ہے، خاص کر بی جے پی کے اقتدار میں جو ظلم کیے جا رہے ہیں اس کے خلاف اب ایس سی محکمہ بھی اقلیتی محکمہ کے ساتھ تال میل بنا کر متحد ہو کر کام کرے گا اور بابا صاحب کے ذریعہ بنائے گئے آئین کی حفاظت کرنے کا کام کرے گا۔ عمران پرتاپ گڑھی نے کہا کہ کانگریس ہمیشہ سے ہی اقلیتوں اور دلتوں کی لڑائی لڑتی آئی ہے اور انہیں بڑے بڑے عہدوں پر بٹھایا ہے۔ اس موقع پر خصوصی طور سے محمد شہزاد شیخ، صداقت علی، عابد علی، شہنواز شیخ، شاکر علی موجود تھے۔