’لو جہاد‘ پر وزیر اعلیٰ شیوراج کی دھمکی، کہا ’ایسی حرکت کرنے والوں کو تباہ کر دوں گا‘

اتر پردیش میں ـلو جہاد‘ کے تعلق سے آرڈیننس پاس ہونے کے بعد کچھ دیگر بی جے پی حکمراں ریاستوں میں بھی قانون کا مسودہ تیار کرنے کی تیاریاں شروع ہو گئی ہیں۔ مدھیہ پردیش کے وزیر اعلیٰ شیوراج سنگھ چوہان نے بھی اپنی ریاست میں لو جہاد کے خلاف قانون لانے کی بات کہی ہے اور انھوں نے اپنے ایک تازہ بیان میں دھمکی آمیز لہجے میں یہاں تک کہہ دیا ہے کہ ایسی حرکت کرنے والوں کے ساتھ سختی سے پیش آیا جائے گا۔

میڈیا ذرائع سے موصول ہو رہی خبروں کے مطابق شیوراج نے سیہور کے بدنی علاقہ میں جلسہ عام سے خطاب کرتے ہوئے کہا کہ ’’اگر بیٹیوں کے ساتھ گھناؤنی حرکت کرنے کی کوشش کی گئی تو توڑ کر رکھ دوں گا۔‘‘ انھوں نے واضح لفظوں میں کہا کہ ’’صاف سن لو، حکومت سب کی ہے۔ سب ذات، سبھی مذاہب کی۔ کوئی تفریق نہیں ہے۔ لیکن اگر بیٹیوں کے ساتھ گھناؤنی حرکت کرنے کی کوشش کی گئی تو توڑ کر رکھ دوں گا۔ یہ نہیں چلے گا۔ میں جانتا ہوں ایسی بیٹیوں کی زندگی تباہ ہو جاتی ہے، برباد ہو جاتی ہے۔ جہنم بن جاتی ہے، وہ در در کی ٹھوکریں کھاتی ہیں۔‘‘

اپنی بات کو آگے بڑھاتے ہوئے انھوں نے باضابطہ ’لو جہاد‘ لفظ کا استعمال بھی کیا۔ انھوں نے کہا کہ ’’مذہب تبدیلی کی سازش، لو جہاد جیسی چیز دیکھنے کو ملی تو تباہ ہو جاؤ گے، برباد ہو جاؤ گے۔ یہ مدھیہ پردیش میں نہیں چلنے دیں گے۔‘‘ قابل ذکر ہے کہ شیوراج سنگھ چوہان اس سے قبل بھی لو جہاد کے خلاف عوامی جلسہ میں بیان دے چکے ہیں۔ وہ اسمبلی کے آئندہ اجلاس میں بل لا کر قانون بنانے کی بات بھی کہہ چکے ہیں۔ شیوراج نے عوام سے خطاب کرتے ہوئے ایک جلسہ میں کہا تھا کہ ’’بہن بیٹیوں کی عزت کی حفاظت ہر قیمت پر کی جائے گی۔ قصورواروں کو سخت سزا ملے گی۔ خواتین کی خودمختاری حکومت کا ہدف ہے، ہم اسے حاصل کریں گے۔‘‘