پٹرول ڈیزل گاڑیوں پر پابندی کا کوئی ارادہ نہیں: گڈکری

نئی دہلی: مرکزی سڑک، ٹرانسپورٹ اور ہائی وے کے وزیر نتن گڈکری نے جمعرات کو کہا کہ پٹرول اور ڈیزل کی گاڑیوں پرپابندی عائد کرنے کا حکومت کا کوئی ارادہ نہیں ہے۔

گاڑی ساز کمپنیوں کی تنظیم سیام کے 59 ویں سالانہ اجلاس سے خطاب کرنے کے بعد نامہ نگاروں کے سوال کے جواب میں گڈکری نے کہا کہ پٹرول اورڈیزل گاڑیوں پر پابندی عائد کرنے کے لئے کوئی میعاد طے نہیں کی گئی ہے اور نہ ہی ایسا کرنے کا حکومت کا کوئی ارادہ ہے۔ انہوں نے کہا کہ اس کے باوجود حکومت بجلی اور متبادل ایندھنوں سے چلنے والی گاڑیوں کے استعمال کو فروغ دے رہی ہے کیونکہ ملک پر پٹرولیم درآمدات کا سات لاکھ کروڑ روپے کا سالانہ بوجھ پڑتا ہے۔ ساتھ ہی آلودگی کے سنگین مسئلہ کا بھی سامنا کرنا پڑ رہا ہے۔

انہوں نے تسلیم کیا کہ موجودہ اعداد و شمار سے یہ واضح ہے کہ گاڑی صنعت اس وقت مسائل کے دور سے گزر رہا ہے۔ مرکزی وزیر نے صنعت کو حکومت کی طرف سے ہر ممکن مدد کی یقین دہانی کرائی۔

گڈکری نے بتایا کہ انہوں نے سیام کو مشورہ دیا ہے کہ بینکوں کی جانب سے وہیکلز لون کی دستیابی کم ہونے کے حالات کو دیکھتے ہوئے گاڑی کمپنیاں اپنا این بی ایف سی بنا کر وہیکلز لون دے سکتی ہیں۔ اس سے انہیں فروخت میں اضافہ کرنے میں مدد ملے گی۔ حکومت اپنی طرف سے گاڑی اور دوسرے قرضوں کی دستیابی بڑھانے کی کوشش کر رہی ہے۔صنعت بھی اس میں تعاون کر سکتی ہیں۔

اس مہینے کی پہلی تاریخ سے لاگو نئے آٹو وہیکلز ایکٹ کا دفاع کرتے ہوئے انہوں نے کہا کہ حکومت کی خواہش جرمانہ زیادہ رکھنے کی بالکل نہیں ہے۔ وہ چاہتی ہے کہ حادثات کم ہوں تاکہ لوگوں کی جان بچ سکے۔ انہوں نے بتایا کہ ملک میں ہر سال پانچ لاکھ سڑک حادثات ہوتے ہیں جن میں ڈیڑھ لاکھ لوگوں کو اپنی جان گنواني پڑتی ہے۔

کچھ ریاستوں کی طرف سے ایکٹ کو لاگو نہیں کئے جانے کے سوال پر مرکزی وزیر نے کہا کہ 20 ریاستوں کی نقل و حمل وزراء کی کمیٹی نے اس کا مسودہ بل تیار کیا تھا جس میں سات سیاسی پارٹیوں کی نمائندگی تھی۔ اس کے بعد بل پارلیمنٹ کی مشترکہ اسٹینڈنگ کمیٹی اور قائمہ کمیٹی کے پاس بھیجا گیا تھا۔

کانفرنس سے خطاب کرتے ہوئے گڈکری نے کہا کہ حکومت مکمل طورپر گاڑی کی صنعت کے ساتھ ہے۔ فروخت بڑھانے کے لئے صنعت کاجو بھی مشورہ ہو وہ حکومت کو دے۔ حکومت ان پر غور کرے گی۔ گڈکری نے کہا کہ کاروبار کے نشیب و فراز، نفع نقصان کا دور آتا رہتا ہے۔ اس سے مایوس ہونے کی ضرورت نہیں ہے. گاڑی صنعت کی کامیابی کی کہانی بہت اچھی رہی ہے اور خود اعتمادی کے بل پر وہ اس فراز کے دور سے نکل سکتی ہے۔

انہوں نے کہا کہ برآمدات بڑھاکر مقامی مارکیٹ میں کم فروخت کی تلافی کی جا سکتی ہے. اس کے لئے حکومت بھی ضروری حوصلہ افزائی کے منصوبہ بنا سکتی ہے۔