کورونا کے پیش نظر دنیا کو یوگا کی اب زیادہ ضرورت ہے: مودی

نئی دہلی: وزیر اعظم نریندر مودی نے کورونا وبا کے تناظر میں یوگ کے بڑھتے ہوئے کردار پر زور دیتے ہوئے اتوار کو کہا کہ دنیا کو پہلے کے مقابلے میں اب یوگا کی زیادہ ضرورت محسوس ہو رہی ہے کیوں کہ اس سے قوت مدافعت مضبوط ہوتی ہے۔ پی ایم مودی نے چھٹےعالمی یوم یوگا کے موقع پر اپنے خطاب میں کہا کہ کورونا جیسی بیماریوں پر قابو پانے کے لئے جسم میں قوت مدافعت مضبوط ہونا ضروری ہے اور زندگی میں یوگا کو اپنانے سے ایسی بیماریوں کو شکست دی جاسکتی ہے۔

وزیر اعظم نے کہا کہ کووڈ۔ 19 سانس کے نظام پر زیادہ حملہ کرتا ہے جسے پران یام یا سانس لینے کی مشقوں سے مضبوط کیا جاسکتا ہے۔ انہوں نے کہا کہ ’’کورونا وائرس خاص طور پر ہمارے نظام تنفس پر حملہ کرتا ہے۔ ہمارے نظام تنفس کو مضبوط بنانے میں جس سے سب سے زیادہ مدد ملتی ہے وہ ہے پران یام یعنی سانس لینے کی مشقیں۔ عام طور پر’انولوم ولوم‘ زیادہ مشہور ہے اور یہ کافی موثر بھی ہیں، لیکن پران یام بھی مختلف اقسام کے ہیں‘‘۔

وزیر اعظم نے کہا کہ یوگا اتحاد کی ایک قوت کے طور پر ابھرا ہے اور یہ رنگ و نسل، جنس، مذہب اور ممالک کی بنیاد پر امتیازی سلوک نہیں کرتا ہے۔ انہوں نے کہا کہ عالمی یوم یوگا یکجہتی کا دن ہے، یہ عالمی بھائی چارے کے پیغام کا دن ہے۔ انہوں نے کہا کہ ’’جو ہمیں جوڑے، ساتھ لائے، وہی تو یوگ ہے۔ جو فاصلہ ختم کر ے، وہی تو یوگ ہے ۔

وزیر اعظم مودی نے کہا کہ یوگا جوڑتا ہے اور جب پورا خاندان مل کر یوگ کرتا ہے جسم کو نئی توانائی ملتی ہے۔ انہوں نے کہا کہ پوری دنیا کے لوگ یوگا کررہے ہیں۔ یوگا کی قوت سے طاقت ملتی ہے اور شخص میں حیرت انگیز طاقت پیدا ہوتی ہے۔ پی ایم مودی نے کہا کہ یوگا انسان میں نہ صرف جسمانی طاقت کو بڑھاتا ہے بلکہ انسان کو ذہنی طور پر بھی مضبوط بناتا ہے۔ انہوں نے کہا کہ یوگا سے انسان میں خود اعتمادی بڑھتی ہے اور وہ کسی بھی بحران کو موثر طریقے سے حل کرنے کے اہل ہو جاتا ہے۔