عزاداروں کے خلاف 'غیر ضروری طاقت' کا استعمال مہذب معاشرے کے شایان شان نہیں: عمر عبداللہ

سری نگر: نیشنل کانفرنس کے نائب صدر و سابق وزیر اعلیٰ عمر عبداللہ نے جموں و کشمیر پولیس کی جانب سے محرم کے ماتمی جلوسوں کے دوران عزاداروں کے خلاف طاقت کے 'غیر ضروری' استعمال کی پرزور مذمت کرتے ہوئے کہا ہے کہ یہ رویہ ایک مہذب معاشرے کے شایان شان نہیں ہے۔ انہوں نے اپنے ایک ٹوئٹ میں کہا کہ "عزاداروں کے خلاف طاقت کے غیر ضروری استعمال بشمول پیلٹ بندوقوں سے کی جانے والی فائرنگ کی پرزور مذمت کرتے ہیں۔ یہ بے مثال کریک ڈاؤن ایک مہذب معاشرے کے شایان شان نہیں ہے۔"

دریں اثنا نیشنل کانفرنس کے صوبائی صدر کشمیر ناصر اسلم وانی نے اپنے ایک بیان میں عاشورہ کے جلوسوں پر بقول ان کے طاقت کے بے تحاشہ اور بلا جواز استعمال اور عزاداروں پر پیلٹ گنوں کے دہانے براہ راست کھولنے کی شدید اور پرزور مذمت کرتے ہوئے کہا ہے کہ حکمرانوں نے ظلم و تشدد کی تمام حدیں پار کردی ہیں۔ انہوں نے کہا کہ جس طرح سے کشمیر میں عزاداروں کے خلاف طاقت کے استعمال اور ان پر پیلٹ اور ٹیئر گیس شلنگ کی گئی، دنیا میں اس کی کوئی بھی مثال نہیں ملتی۔ محرم کے ایام اور خصوصاً یوم عاشورہ پر عزاداروں کے خلاف طاقت کا استعمال، ٹیئر گیس شلنگ اور فائرنگ ناقابل قبول ہے۔

انہوں نے کہا کہ ملک کی مختلف ریاستوں میں مختلف مذاہب سے تعلق رکھنے والے لوگوں نے سخت ترین لاک ڈاﺅن کے بیج بھی پروگراموں کا انعقاد کیا جن میں ہزاروں لوگوں نے شرکت کی، لیکن ان پروگراموں کے انعقاد پر نہ تو کسی نے روک لگائی اور نہ ان پروگراموں کے شرکاء کے خلاف طاقت کا استعمال کیا گیا لیکن کشمیر میں عزاداروں کے خلاف بے تحاشہ طاقت کا استعمال کیا گیا، جنہوں نے کووڈ-19 کی احتیاطی تدابیر پر بھر پور عمل کر کے جلوس نکالنے کی کوشش کی۔ ایسے میں یہ سوال ابھر کر سامنے آتا ہے کہ کشمیری مسلمانوں کے ساتھ یہ دوہرا معیار کیوں؟ اس بات کی تحقیقات ہونی چاہیے کہ کس کی ایما پر کشمیر میں عزاداروں کے خلاف طاقت کا بے تحاشہ استعمال کیا گیا۔

ناصر اسلم وانی نے اُن عناصر کے خلاف بھی سخت کارروائی کا مطالبہ کیا جو بقول ان کے دلی میں بیٹھ کر بھگوا جماعتوں کے ایجنڈا پر عمل پیرا ہوکر کشمیر میں عزاداروں کے خلاف بے تحاشہ طاقت کے استعمال کو فرقہ وارانہ رنگت دینے کی کوشش کر رہے ہیں۔