کانپور واردات کے مجرموں کوسخت ترین سزا دی جائے: مایاوتی

نئی دہلی: بہوجن سماج پارٹی کی صدر مایاوتی نے کانپور میں ہلاک ہونے والے پولیس اہلکاروں کے اہل خانہ کو معاوضے کا مطالبہ کرتے ہوئے کہا ہے کہ مجرموں کو سخت ترین سزا دی جانی چاہئے۔ مایاوتی نے ٹوئٹر پر کہا کہ مجرموں کو کسی قیمت پر بھی نہیں چھوڑاجانا چاہئے۔ ان مجرموں کو سخت سے سخت سزا دی جانی چاہئے اور ان کی گرفتاری کے لئے خصوصی کاروائیاں کی جائیں۔

واضح رہے کہ اتر پردیش کے کانپور علاقے میں ایک بدنام زمانہ مجرم کو پکڑنے گئی پولیس کی ٹیم پر شرپسندوں نے حملہ کر دیا، جس میں ایک سی او (ڈی ایس پی) اور تین سب انسپکٹروں سمیت آٹھ پولیس جوان شہید ہو گئے جبکہ سات زخمی ہیں۔

ایڈیشنل ڈائریکٹرجنرل آف پولیس جئے نارائن سنگھ نے بتایا کہ کانپور کے چوبے پور کے علاقے میں جمعرات کو رات دیر گئے ڈپٹی سپرنٹنڈنٹ پولیس بلہور دیویندر مشرا کی سربراہی میں، بٹھور ، چوبے پور ، شیوراج پور پولیس اسٹیشنوں کی پولیس ٹیمیں مجرم وکاس دوبے کو پکڑنے گاؤں وکرو پہنچی تھیں۔ محاصرے کے بعد بدمعاش کی گرفتاری کے لئے ایک جال بچھایا گیا تھا۔ شرپسندوں نے چھت پر چڑھ کر پولیس پر فائرنگ شروع کردی۔

اس واقعے میں ڈپٹی سپرنٹنڈنٹ پولیس بلہور دیویندر کمار مشرا کے علاوہ شیو راج پور کے تھانہ انچارج مہیش یادو، ماندھنا چوکی انچارج انوپ کمار، شیو کراج پور پولیس اسٹیشن میں تعینات سب انسپکٹر نیبولال، چوبے پور تھانہ میں تعینات کانسٹیبل سلطان سنگھ، بٹور تھانہ میں تعینات کانسٹیبل راہل، جتیندر اور ببلو شہید ہو گئے۔ واقعے میں سات پولیس اہلکار کے زخمی ہونے کی بھی اطلاع ہے، جنہیں اسپتال میں داخل کرادیا گیا ہے۔