ہاتھرس متاثرہ کنبہ کا درد آیا سامنے، راہل گاندھی نے جاری کیا ویڈیو

کانگریس کے سابق صدر راہل گاندھی نے اتر پردیش کے ہاتھرس اجتماعی عصمت دری اور قتل کی شکار متاثرہ کی فیملی سے ملاقات کا ایک ویڈیو جاری کیا ہے۔ ویڈیو میں متاثرہ فیملی نے اپنے اوپر ہوئے مظالم کو بیان کیا ہے۔ راہل گاندھی نے کہا کہ متاثرہ کنبہ پر ہوئے مظالم کے بارے میں ہر ہندوستانی کو جاننا بے حد ضروری ہے۔

راہل گاندھی نے ویڈیو اپنے ٹوئٹر ہینڈل سے شیئر کیا ہے جس میں لکھا ہے کہ "دیکھیے، ہاتھرس متاثرہ کنبہ کو اتر پردیش حکومت کے کیسے کیسے مظالم اور استحصال کا سامنا کرنا پڑا۔ ان کے ساتھ ہوئی ناانصافی کی سچائی ہر ہندوستانی کے لیے جاننا بہت ضروری ہے۔"

واضح رہے کہ کانگریس لیڈر راہل گاندھی اور پرینکا گاندھی گزشتہ 3 اکتوبر کو دن بھر اتر پردیش پولس و انتظامیہ سے جدوجہد کرتے ہوئے دیر شام ہاتھرس اجتماعی عصمت دری متاثرہ کنبہ کے گھر پہنچے تھے۔ پرینکا گاندھی کو اپنے گھر پر دیکھتے ہی متاثرہ کی ماں ان کے گلے لپٹ کر رونے لگی تھیں۔ اس کے بعد راہل گاندھی اور پرینکا گاندھی نے مہلوکہ کے والدین اور بھائیوں سے کافی دیر تک بات کی۔ اس دوران متاثرہ کنبہ نے اپنے ساتھ ہوئے ایک ایک واقعہ کا تذکرہ کیا۔ اس دوران دونوں لیڈروں نے انھیں ہر ممکن مدد کا بھروسہ دلایا۔

متاثرہ فیملی سے ملاقات کے بعد پرینکا گاندھی نے کہا تھا کہ گھر والے آخری بار اپنی بچی کا چہرہ تک نہیں دیکھ پائے جو افسوسناک ہے۔ پرینکا گاندھی نے کہا کہ فیملی اس واقعہ کی عدالتی جانچ اور ضلع مجسٹریٹ کو ہٹانا چاہتی ہے اور ساتھ ہی چاہتی ہے کہ ان کی سیکورٹی کا انتظام کیا جائے۔ کانگریس جنرل سکریٹری نے ساتھ ہی کہا کہ وزیر اعلیٰ یوگی آدتیہ ناتھ کو اپنی ذمہ داری سمجھنی ہوگی۔ جب تک انصاف نہیں ملتا، تب تک ہم لڑائی جاری رکھیں گے۔