ہندوستان میں کورونا کے نئے کیسز کی تعداد پھر 50 ہزار سے کم، فعال کیسز میں لگاتار کمی

نئی دہلی: ملک میں لگاتار چھٹے دن کورونا وائرس کے نئے کیسز 50000 سے بھی کم رپورٹ ہوئے ہیں اور اس جان لیوا وبا سے شفایاب ہونے والے مریضوں کی تعداد زیادہ رہنے سے اموات اور ایکٹیو کیسز کی شرح میں کمی آرہی ہے۔ ہفتہ کو مرکزی وزارت صحت و خاندانی بہبود کی جانب سے جاری کردہ اعداد و شمار کے مطابق کورونا کو مات دینے والوں کی شرح 91.34 فیصد رہ گئی ہے، جبکہ اموات کی شرح گھٹ کر 1.49 فیصد اور ایکٹیو کیسز کی شرح 7.16 فیصد رہ گئی ہے۔

گزشتہ 24 گھنٹوں کے دوران ملک کے مختلف حصوں میں کورونا وائرس کے 48268 نئے کیسز رپورٹ ہوئے اور یہ لگاتار چھٹا دن ہے جب کووڈ- 19 کے 50 ہزارسے کم کیسز رپورٹ ہوئے ہیں۔ اس سے قبل جمعہ کے روز 48648 جمعرات کو 49881 بدھ کے روز 43843، منگل کو 36470 اور پیر کو 45149 کیسز رپورٹ ہوئے تھے۔

گزشتہ 24 گھنٹوں کے دوران 59454 مریض اس جان لیوا وبا سے شفایاب اور 551 افراد ہلاک ہوئے ہیں۔ اب تک ملک میں 81.37 لاکھ سے زائد افراد کورونا وائرس سے متاثر ہوچکے ہیں، جن میں سے تقریباً 74.33 لاکھ افراد صحت مند اور 121641 لاکھ افراد لقمہ اجل بن چکے ہیں۔ صحت مند لوگوں کی تعداد میں اضافے سے ایکٹیو کیسز 11737 سے گھٹ کر 582649 رہ گئی ہے۔

ملک بھر میں خواہ کورونا وائرس کے مریضوں کی تعداد میں کمی آئی ہے لیکن قومی راجدھانی دہلی میں کورونا کے کیسز میں پھر سے اضافہ ہو رہا ہے۔ دہلی میں لگاتار تیسرے دن 5 ہزار سے زیادئے کیسز رپورٹ ہوئے۔ ماہرین کا خیال ہے کہ دیوالی آس پاس کورونا کے کیسز میں اضافہ سکتا ہے۔