آخری بھیڑیے نے بہرائچ کے لوگوں کی نیند اُڑائی، چھت پر سو رہے بچے کی گردن دبوچ لی

محکمہ جنگلات کی ٹیم کی گرفت سے لگاتار بچ رہے آخری لنگڑے بھیڑیے نے بہرائچ میں خوف کا ماحول قائم کر دیا ہے۔ یہ خونخوار جانور پچھلے کچھ دنوں میں اپنے حملے سے کئی لوگوں کو زخمی کر چکا ہے۔ اب اپنے نئے حملے میں بھیڑیے نے 13 سال کے ایک لڑکے کو لہو لہان کر دیا۔

بتایا جاتا ہے کہ مہسی علاقے کے پپری موہن گاؤں میں ارمان علی نام کا ایک لڑکا گزشتہ رات اپنی چھت پر سو رہا تھا۔ تبھی اچانک بھیڑیے نے اس کی گردن دبوچ لی۔ چیخ پکار کی آواز سن کر آدم خور بھیڑیا فرار ہو گیا لیکن اس دوران اس نے بچے کو بُری طرح زخمی کر دیا۔ ارمان کی گردن، چہرے پر زخم کے نشان ہیں۔ لڑکے کو اسپتال میں داخل کرایا گیا ہے جہاں اس کا علاج کیا جا رہا ہے۔ بھیڑیے کے اس نئے حملے کے بعد پورے علاقے کے لوگوں میں زبردست خوف کا ماحول پیدا ہو گیا ہے۔

بہرائچ میں آدم خور بھیڑیا اپنے پانچویں ساتھی کے پکڑے جانے کے بعد اب تک خاتون اور بچوں پر حملہ کرکے انہیں بُری طرح زخمی کر چکا ہے۔ حالانکہ مہسی اور شیو پور کے 110 گاؤں میں محکمہ جنگلات، پولیس، پی ایس سی کے جوان اور ضلع کے ملازمین روسٹر وائز گشت کر رہے ہیں لیکن پھر بھی بھیڑیا گرفت سے دور ہے اور انسانوں پر لگاتار حملے کر رہا ہے۔ مہسی تحصیل میں گزشتہ تین مہینوں سے آدم خور بھیڑیے کی دہشت قائم ہے۔ بھیڑیوں کے جھنڈ نے اب تک 9 بچوں سمیت 10 لوگوں کو مار ڈالا ہے جبکہ اس کے حملے میں 50 سے زیادہ لوگ زخمی ہوئے ہیں۔

غور طلب رہے کہ 15 ستمبر کو ہی یوپی کے وزیراعلیٰ یوگی آدتیہ ناتھ نے بھیڑیا کے قہر سے متاثر علاقوں کا فضائی معائنہ کرنے کے بعد حملے میں مارے گئے بچوں کے خاندان والوں سے ملاقات کی تھی۔ اس موقع پر یوگی آدتیہ ناتھ نے کہا تھا کہ جب تک بھیڑیوں کی دہشت ختم نہیں ہو جاتی تب تک محکمہ جنگلات کی ٹیم اس علاقے میں رہے گی۔