رام مندر : ’بھومی پوجن‘ پر شنکراچاریہ سوروپانند سرسوتی نے اٹھائے سوال

ایودھیا میں رام مندر تعمیر کے لیے تیاریاں شروع ہو گئی ہیں اور 'بھومی پوجن' کی تاریخ 5 اگست مقرر کی گئی ہے۔ بھومی پوجن میں پی ایم نریندر مودی سمیت کچھ اہم شخصیتیں شامل ہونے والی ہیں، لیکن اس سے پہلے جگت گرو شنکراچاریہ سوروپانند سرسوتی نے ایک بڑا بیان دیا ہے۔ انھوں نے بھومی پوجن کی تاریخ پر ہی سوال کھڑے کر دیے ہیں۔ ان کا کہنا ہے کہ "بھگوان رام کا عظیم الشان مندر بننا چاہیے، اس میں سیاست نہیں ہونی چاہیے۔ سیاست کی وجہ سے ہی ہندوؤں کے کئی ایشوز کھٹائی میں پڑ جاتے ہیں۔ جس تاریخ میں رام مندر کا سنگ بنیاد رکھا جا رہا ہے، وہ گھڑی مناسب نہیں ہے، اشبھ گھڑی (منحوس وقت) ہے۔"

نرسنگھ پور ضلع کے اپنے آشرم میں شنکراچاریہ سوروپانند سرسوتی نے کہا کہ سناتن مذہب کی اصل بنیاد 'وید' ہیں۔ ویدوں کے مطابق کیے گئے عمل 'یگیہ' کہے جاتے ہیں جو پوری طرح 'کال' (وقت) کی شماری پر مبنی ہیں۔ کال شماری اور خاص وقت کے مبارک اور منحوس ہونے کا علم 'جیوتش شاستر' سے ہوتا ہے۔ اسی لیے جیوتش کو 'ویدانگ' کہا گیا ہے۔ اسی لیے سناتن مذہب کا ہر مرید اپنے کام مبارک وقت میں شروع کرتے ہیں جسے 'شبھ مہورت' کے نام سے جانا جاتا ہے۔

شنکراچاریہ کا کہنا ہے کہ ہر چھوٹے بڑے کام کو شبھ مہورت (مبارک وقت) میں مکمل کرنے والا سناتنی سماج آج افسردہ ہے کہ پورے ملک کے کروڑوں لوگوں کی عقیدت کے مرکز رام مندر کی تعمیر بغیر شبھ مہورت کے شروع ہونے جا رہی ہے۔ جیسا کہ شری رام جنم بھومی تیرتھ چھیتر ٹرسٹ کے ذریعہ سے آئندہ 5 اگست 2020 کو سنگ بنیاد رکھنے کا اعلان کیا گیا ہے، یہ وقت مبارک نہیں ہے۔ انھوں نے کہا کہ "اگر ایودھیا میں مندر بنایا جانا ہے تو اسے مبارک وقت میں شاستروں کے مطابق ہی بنایا جانا چاہیے۔ لیکن ایسا نہ کر کے منمانی کیے جانے سے یہ اندیشہ واضح ہو رہا ہے کہ وہاں مندر نہیں سنگھ کا دفتر بنایا جا رہا ہے۔"

اپنی بات واضح کرتے ہوئے شنکراچاریہ نے کہا کہ "معلوم ہو کہ 5 اگست 2020 کو 'دکشناین بھادرپد ماس کرشن پکش کی دوئتیا' تاریخ ہے۔ شاستروں میں بھادرپد ماس میں گھر-مندر تعمیر ممنوع ہے۔ قابل غور ہے کہ کاشی میں وشوناتھ مندر کے آس پاس کے مندروں کو توڑتے وقت بھی ہم نے متنبہ کیا تھا کہ یہ کام پوری دنیا کو پریشانی میں ڈالے گا، لیکن بات ان سنی کرنے کا نتیجہ سب لوگ دیکھ رہے ہیں۔"