شملہ مندر حادثے میں مرنے والوں کی تعداد 14 تک پہنچ گئی

شملہ: ہماچل پردیش کی راجدھانی میں مٹی کے تودے گرنے کے بعد مندر کے منہدم ہونے کے بعد چوتھے دن بھی تلاش کا کام دوبارہ شروع کرتے ہوئے امدادی کارکنوں نے جمعرات کو ایک لاش برآمد کی۔ اس کے ساتھ ہی اس واقعے میں مرنے والوں کی تعداد 14 ہو گئی ہے۔

ایک اہلکار نے آئی اے این ایس کو بتایا کہ لاش ہماچل پردیش یونیورسٹی کے ایک پروفیسر کی ہے۔ اسے تباہی کے مقام سے دو کلومیٹر دور برآمد کیا گیا۔ حکام کو شبہ ہے کہ ملبے کے نیچے اب بھی کم از کم 7 اور افراد پھنسے ہو سکتے ہیں۔ حکام نے بتایا کہ ایک لاش کو چھوڑ کر سبھی کی شناخت کر کے ان کے لواحقین کے حوالے کر دی گئی ہے۔

لوگوں کے رشتہ داروں نے ان کے ٹھکانے کے بارے میں جاننے کے لیے مقامی حکام سے رابطہ کیا ہے۔ ایک ریسکیو اہلکار نے بتایا کہ ’’اب تک ہمیں سات لاپتہ افراد کے بارے میں معلومات ملی ہیں اور ہم ان کا سراغ لگانے کے لیے کام کر رہے ہیں۔‘‘ انہوں نے کہا کہ مرنے والوں میں ایک ہی خاندان کے سات افراد شامل ہیں، جن میں تین بچے بھی شامل ہیں، جو آفت کے وقت شیو باوڑی مندر کے اندر تھے۔

سمر ہل مارکیٹ میں ایک دکان کے مالک 60 سالہ پون شرما، ان کی 57 سالہ بیوی سنتوش شرما، 32 سالہ بیٹا امان شرما، 27 ساسلہ بہو ارچنا شرما اور تین پوتیاں، جن کی عمریں 12 سے 1.5 سال کے درمیان تھیں، ہون کے لئے مندر میں تھے جب وہ منہدم ہوا۔ خاندان کے چار افراد کی لاشیں مل گئی ہیں، تین ابھی تک لاپتہ ہیں اور ریسکیورز کا کہنا ہے کہ ان کے بچنے کے امکان بہت کم ہیں۔

وزیر اعلیٰ سکھوندر سکھو، جنہوں نے تباہی کے فوراً بعد جائے وقوعہ کا دورہ کیا، اسے ایک بے مثال سانحہ قرار دیا۔ انہوں نے کہا کہ ریاست کو گزشتہ 50 سال کی میں بدترین قدرتی آفت کا سامنا ہے۔ اسی دن شملہ کے پھاگلی میں ایک اور لینڈ سلائیڈنگ ہوئی جس میں پانچ افراد ہلاک ہو گئے۔ ایک دن بعد، شملہ کے پرانے بس اسٹینڈ کے قریب کرشنا نگر علاقے میں کم از کم پانچ مکانات گر گئے، جس میں دو افراد کی موت ہو گئی۔