ٹرمپ کو ہند-پاک کے مابین کشیدگی جلد ختم ہونے کی امید

ہنوئی: امریکی صدر ڈونالڈ ٹرمپ نے جموں و کشمیر کے پلوامہ میں دہشت گرد تنظیم جیش محمد کے حملے میں سینٹرل ریزرو پولس فورس کے 40 جوانوں کے شہید ہونے کے بعد ہندوستان اور پاکستان کے درمیان بڑھنے والی کشیدگی جلد ختم ہونے کی امید ظاہر ہے۔

ٹرمپ نے ہنوئی میں شمالی کوریا کے حکمراں کم جونگ ان کے ساتھ دوسرے سربراہی اجلاس کے بعد کہا کہ ان کے پاس ہندوستان اور پاکستان سے کچھ 'معقول اچھی' خبر ہے۔ امید ہے کہ دونوں ممالک کے درمیان جاری کشیدگی جلد ہی ختم ہونے جا رہی ہے۔ انہوں نے کہا کہ دونوں ملکوں کے درمیان دہائیوں سے یہ کشیدگی بنی ہوئی ہے جس کے جلد ہی ختم ہونے کی امید ہے۔ تاہم، انہوں نے اس کے بارے میں تفصیلی معلومات نہیں دی۔

امریکہ نے حال ہی میں دونوں ممالک کو سرحد پار فوجی سرگرمیوں کو بند کرنے اور کشیدگی کم کرنے کے لئے فوری طور پر براہ راست بات چیت سمیت تمام ضروری اقدامات کرنے کو کہا تھا۔ ہندوستان اور پاکستان سے استحکام کی جانب لوٹنے کی کوششیں کرنے کی اپیل کرتے ہوئے امریکہ نے کہا تھا کہ پاکستان کو اقوام متحدہ کی سلامتی کونسل کے ساتھ کی گئی عہد بندیوں پر عمل کرنا چاہیے اور دہشت گردوں کو محفوظ پناہ گاہ مہیا نہیں کرانا چاہیے اور ان کا دیا جا رہا فنڈ بھی روک دینا چاہیے۔

واضح ر ہے کہ 14 فروری کو ہونے والے پلوامہ حملے کے 13 دن بعد منگل کے روز ہندوستانی فضائیہ نے پاکستان کے بالاكوٹ میں ہوائی حملے کر کے جیش محمد کے سب سے بڑے تربیتی کیمپ کو تباہ کر دیا تھا۔ اس کے اگلے دن بدھ کے روز ایک پاکستانی طیارے نے ہندوستانی فضائی حدود میں گھسنے کی کوشش کی جسے فضائیہ نے مار گرایا، لیکن اس دوران ایک ہندوستانی طیارہ بھی پاکستان میں گر کر تباہ ہو گیا اور اس کے پائلٹ ونگ کمانڈر ابھینندن ورتمان کو گرفتار کر لیا گیا تھا۔