تلنگانہ: اردو صحافیوں کی مالی اعانت کا مطالبہ، وزیر اعلیٰ کو مکتوب پیش

حیدرآباد: سابق رکن راجیہ سبھا سی پی آئی و صدر آل انڈیا تنظیم انصاف عزیز پاشاہ نے تلنگانہ کے وزیراعلی کے چندرشیکھر راؤ کو ایک مکتوب روانہ کرتے ہوئے ریاست کی دوسری سرکاری زبان اردو کے مسلمہ و غیر مسلمہ صحافیوں کے لئے خصوصی مالی اعانت دینے کامطالبہ کیا اور کہا کہ اردو کے ہر صحافی کو 15000 روپئے موجودہ لاک ڈاون کی صورتحال کے پیش نظر جاری کیے جائیں۔

انہوں نے کہا کہ لاک ڈاون اور کورونا وائرس کی وبا کے سبب لیبر طبقہ کے ساتھ ساتھ یومیہ اجرت پر کام کرنے والے محنت کش طبقات معاشی پسماندہ طبقات ہر طرح کے بحران کا شکار ہیں اور گزشتہ دو ماہ میں ان کے حالات قابل رحم ہوگئے ہیں۔ جس طرح دیگر شعبہ جات کے افراد کو ممکنہ سہارا دیئے جانے کی کوششیں قابل ستائش ہے وہیں اردوصحافیوں کے لئے امداد کی اجرائی موجودہ حالات میں ناگزیر ہے۔

عزیز پاشاہ نے کہا کہ ایک جانب ریاست میں تمام طبقات کو امداد کے دعوے کیے جا رہے ہیں تو وہیں اردو صحافیوں کے غیر معمولی تعمیری مثبت قومی مفاد میں کیے گئے کام کو پیش نظر رکھتے ہوئے عاجلانہ طور پر امداد جاری کی جائے تاکہ عیدالفطر کے موقع پر ان کے چہروں پر بھی مسکراہٹ دکھائی دے۔ اس موقع پر سینئر صحافیوں طاہر رومانی، فرید ضیائی، سید علی الدین احمد اور حمید الدین محمود نے بھی کہا کہ سخت آزمائشی حالات میں اپنی زندگیوں کو جوکھم میں ڈالتے ہوئے اردو صحافی کورونا کی جنگ میں دیگر صحافیوں کے شانہ بشانہ کھڑے ہوکر اپنے فرائض انجام دے رہے ہیں اور کئی چیلنجس کا ان کو سامنا ہے۔