تلنگانہ: بی جے پی کے ارکان اسمبلی کا پروٹیم اسپیکر اکبر الدین اویسی کے سامنے حلف لینے سے انکار

حیدرآباد: تلنگانہ اسمبلی میں ہفتہ کو بی جے پی کے نومنتخب ارکان اسمبلی نے اے آئی ایم آئی ایم کے رکن اسمبلی اکبر الدین اویسی کو پرو ٹیم اسپیکر منتخب کئے جانے کے خلاف پہلے دن ریاستی اسمبلی کا بائیکاٹ کیا۔

ریاستی بی جے پی صدر جی کشن ریڈی کے فیصلے کے بعد بھگوا پارٹی کے تمام 8 ارکان اسمبلی نے کارروائی کا بائیکاٹ کیا۔ کشن ریڈی نے بی جے پی کے دفتر میں میڈیا والوں کو بتایا کہ کانگریس حکومت نے آل انڈیا مجلس اتحاد المسلمین (اے آئی ایم آئی ایم) کے ساتھ خفیہ معاہدے کے تحت اکبر الدین اویسی کو پرو ٹیم اسپیکر منتخب کیا ہے۔

انہوں نے کہا کہ چونکہ کانگریس کے پاس اسمبلی میں اکثریت کم ہے اور حکومت کسی بھی وقت گر سکتی ہے اس لئے اس نے اے آئی ایم آئی ایم سے ہاتھ ملایا ہے۔ کشن ریڈی، جو کہ مرکزی وزیر بھی ہیں، نے دعویٰ کیا کہ اویسی سب سے سینئر ایم ایل اے نہیں ہیں۔ بی جے پی نے ان کی تقرری کے تعلق سے گورنر تملائی سوندراراجن سے بھی شکایت کی۔

ٹی راجہ سنگھ بی جے پی کے پہلے ایم ایل اے تھے جنہوں نے اکبر الدین اویسی کے سامنے حلف لینے سے انکار کیا۔ پچھلی اسمبلی میں بھی انہوں نے اے آئی ایم آئی ایم کے ممتاز احمد خان کے سامنے حلف لینے سے انکار کر دیا تھا، جو پروٹیم اسپیکر تھے۔ بی جے پی کے تمام 8 ارکان اسمبلی صبح بی جے پی کے دفتر میں جمع ہوئے۔ کشن ریڈی نے انہیں مبارکباد دی۔ پارٹی ایم ایل ایز کے ایوان میں حاضر ہونے کے فیصلے کے خلاف احتجاج کرتے ہوئے راجہ سنگھ غصے میں پارٹی دفتر سے چلے گئے۔

رپورٹ کے مطابق ٹی راجہ اس وقت بھی دیگر پارٹی ارکان اسمبلی کے ساتھ نہیں تھے جب انہوں نے تاریخی چارمینار میں مندر میں گئے۔ بی جے پی ایم ایل اے نے ٹانک بنڈ میں ڈاکٹر بی آر امبیڈکر کے مجسمہ کو خراج عقیدت پیش کیا اور اسمبلی میں جانے کا منصوبہ بنایا۔ تاہم انہوں نے پارٹی کی مرکزی قیادت کی ہدایات پر اپنا منصوبہ ترک کر دیا۔

اس کے بعد کشن ریڈی نے ایک پریس کانفرنس میں اعلان کیا کہ پارٹی ایم ایل اے اکبر الدین اویسی کے سامنے حلف نہیں لیں گے۔ انہوں نے کہا کہ پارٹی کے ارکان اسمبلی مستقل اسپیکر کے انتخاب کے بعد ہی حلف اٹھائیں گے۔