تہران: حماس کے سربراہ اسماعیل ہنیہ میزائل حملہ میں جان بحق، پاسداران انقلاب کی تصدیق

تہران: فلسطینی تنظیم حماس نے آج بدھ کے روز اعلان میں بتایا ہے کہ تنظیم کے سیاسی دفتر کے سربراہ اسماعیل ہنیہ جاں بحق ہو گئے ہیں۔ ایرانی میڈیا نے پاسداران انقلاب کے حوالے سے اس خبر کی تصدیق کی ہے کہ اسماعیل ہنیہ تہران میں جان بحق ہوئے ہیں۔

ذرائع نے بتایا کہ تہران میں ہنیہ کی قیام گاہ پر مقامی وقت کے مطابق رات دو بجے حملہ کیا گیا۔ ذرائع کے مطابق ایک میزائل کے ذریعے ہنیہ کے جسم کو براہ راست نشانہ بنایا گیا۔ ذرائع کا کہنا ہے کہ کارروائی میں اسماعیل ہنیہ کے ساتھ ان کے ساتھی وسیم ابو شعبان بھی جاں بحق ہوئے ہیں۔

حماس کے سربراہ ایرانی صدر مسعود پزشکیان کی تقریب حلف برداری میں شرکت کے لئے تہران میں موجود تھے۔ ایک روز قبل منگل کو اسماعیل ہنیہ نے تقریب میں شرکت کی تھی۔ اس دوران انہوں نے ایران کے سپریم لیڈر آیت اللہ علی خامنہ ای سے بھی ملاقات کی تھی۔

ایران کا کہنا ہے کہ قاتلانہ حملے کی تحقیقات کے نتائج جلد سامنے لائے جائیں گے۔ حال ہی میں ہنیہ کے 3 بیٹے بھی اسرائیلی سیکورٹی فورسز کے ہاتھوں قتل کر دئے گئے تھے۔ اسرائیل نے غزہ کی پٹی پر ایک فضائی حملے میں ہنیہ کے بیٹوں کو نشانہ بنایا تھا۔ اسرائیلی فوج آئی ڈی ایف نے بتایا تھا کہ ہنیہ کے تینوں بیٹے عامر، حضیم اور محمد غزہ میں کارروائیاں انجام دینے جا رہے تھے، اسی دوران تینوں فضائی حملے کی زد میں آ گئے۔