لکھیم پور کھیری: تھانہ میں ٹیکسی ڈرائیور نے کی خودکشی کی کوشش، پولیس پر زیادتی کا لگایا الزام

اتر پردیش کے لکھیم پور کھیری واقع گوری پھنتا تھانہ احاطہ میں ایک 26 سالہ نجی ٹیکسی ڈرائیور نے پولیس اور چار دیگر لوگوں پر استحصال کرنے کا الزام عائد کرتے ہوئے خود کو آگ لگا کر خودکشی کرنے کی کوشش کی۔ پولیس کے مطابق متاثرہ نے الزام لگایا ہے کہ چار لوگ اور پولیس اہلکار ٹیکسی ڈرائیورس سے پیسے وصول کر رہے تھے اور جب وہ انھیں ادائیگی کرنے میں ناکام رہا تو انھوں نے اسے پریشان کرنا شروع کر دیا۔ انھوں نے مبینہ استحصال کے بعد خودکشی کی کوشش کرنے کا دعویٰ کیا۔

متاثرہ 80 فیصد سے زیادہ جل گیا ہے اور جس اسپتال میں اس کا علاج چل رہا تھا، وہاں کے ڈاکٹروں نے اس کی حالت سنگین بتائی ہے۔ لکھیم پور کھیری کے پولیس سپرنٹنڈنٹ سنجیو سمن نے گوری پھنتا کے تھانہ انچارج اشونی وشوکرما کو ملزم بناتے ہوئے معطل کر دیا ہے۔ پولیس سپرنٹنڈنٹ نے کہا کہ معاملے کی جانچ کر دو دن میں رپورٹ دینے کے لیے ایڈیشنل پولیس سپرنٹنڈنٹ کو ہدایت دی گئی ہے۔ متاثرہ کا بیان مجسٹریٹ کے سامنے درج کرایا گیا ہے۔

واضح رہے کہ پلیا کے رہنے والے شیوم گپتا بنگاوا علاقے سے گوری پھنتا علاقے تک ٹاٹا میجک چلاتے تھے۔ گپتا نے بدھ کی دیر شب گوری پھنتا تھانہ گیٹ پر پٹرول ڈال کر خود کو آگ لگا کر خودکشی کی کوشش کی۔ پولیس نے کہا کہ خود کو آگ لگانے کے بعد گپتا تھانہ احاطہ کے اندر بھاگ گیا۔ پولیس اہلکاروں نے آگ بجھائی اور اسے اسپتال پہنچایا۔ متاثرہ نے الزام عائد کیا کہ چار لوگ پولیس کی مدد سے اسے پریشان کر رہے تھے اور ٹیکسی نہیں چلانے دے رہے تھے۔ متاثرہ کے چچا پنکج گپتا نے میڈیا کو بتایا کہ شیوم نے یہ قدم اس وقت اٹھایا جب پولیس نے اس کی گاڑی ضبط کر لی اور پٹائی بھی کی۔ انھوں نے یہ بھی الزام لگایا کہ پولیس نے شیوم گپتا کو دھمکی دی تھی کہ اسے جھوٹے معاملے میں پھنسایا جائے گا۔