ایودھیا کے ایڈیشنل ضلع مجسٹریٹ سرجیت سنگھ کی مشتبہ حالت میں موت، کمرے سے برآمد ہوئی لاش

ایودھیا کے ایڈیشنل ضلع مجسٹریٹ (اے ڈی ایم) سرجیت سنگھ کی موت کا سنسنی خیز معاملہ سامنے آیا ہے۔ جمعرات کی صبح سرسری کالونی واقع اپنی رہائش کے کمرے میں ان کی لاش مشتبہ حالت میں پائی گئی۔ اس خبر نے پورے علاقے میں ایک گہما گہمی پیدا کر دی۔ اے ڈی ایم سرجیت سنگھ کی موت سے متعلق خبر ملتے ہی پولیس اور انتظامیہ کے افسران جائے وقوع پر پہنچے اور معاملے کی تفتیش شروع کر دی۔

ذرائع کے حوالے سے جو خبریں سامنے آ رہی ہیں اس میں بتایا جا رہا ہے کہ سرجیت سنگھ کی لاش کمرے کے اندر بند ملی۔ ابتدائی جانچ میں یہ معاملہ مشتبہ معلوم پڑ رہا ہے۔ پولیس نے لاش کو پوسٹ مارٹم کے لیے بھیج دیا ہے اور حادثہ سے جڑے سبھی پہلوؤں کی باریکی سے جانچ کی جا رہی ہے۔

اے ڈی ایم (لاء اینڈ ایڈمنسٹریشن) سرجیت سنگھ کوتوالی نگر کے سرسری کالونی واقع سول لائن میں رہائش پذیر تھے۔ جمعرات کی صبح تقریباً 9.30 بجے کی بات ہے جب ملازمہ نے ان کی لاش دیکھی۔ گھر کے ایک کمرے کی فرش پر چاروں طرف خون پھیلا ہوا تھا۔ حالانکہ اس بارے میں پولیس ابھی کچھ بھی کہنے سے پرہیز کر رہی ہے۔

سرجیت سنگھ کا پورا کنبہ کانپور میں رہتا ہے۔ انھوں نے کھانا بنانے کے لیے ملازمہ رکھا ہوا تھا۔ روزانہ کی طرح جمعرات کی صبح جب ملازمہ کھانا بنانے پہنچی تو کمرے کا نظارہ دیکھ کر وہ چیخ پڑی۔ اس نے دیکھا کہ کمرے میں اے ڈی ایم کی لاش پڑی ہوئی ہے۔ ملازمہ نے فوراً اس کی اطلاع پولیس کو دی۔ خبر ملتے ہی پولیس اور انتظامیہ کے افسران جائے وقوع پر پہنچ گئے۔ ایودھیا کے رکن پارلیمنٹ اودھیش پرساد بھی سرسری کالونی پہنچے۔ انھوں نے افسران سے معاملے کی مکمل جانکاری بھی لی۔ میڈیا سے بات کرتے ہوئے انھوں نے کہا کہ ’’حادثہ بہت افسوسناک ہے۔ سرجیت ایک اچھے افسر تھے۔ اس حادثہ سے مجھے بہت تکلیف پہنچی ہے۔ کبھی ان کی کوئی شکایت نہیں ہوئی۔ عوام میں بھی وہ مقبول تھے۔‘‘