منیش سسودیا کی درخواست ضمانت پر سی بی آئی-ای ڈی کو سپریم کورٹ کا نوٹس، اگلی سماعت 29 جولائی کو

دہلی کے سابق نائب وزیر اعلیٰ اور عام آدمی پارٹی (عآپ) لیڈر منیش سسودیا کی درخواست ضمانت پر منگل (16 جولائی) کو سپریم کورٹ میں سماعت ہوئی۔ سپریم کورٹ نے دہلی شراب پالیسی معاملے میں جیل میں بند سسودیا کی درخواست پر سی بی آئی اور ای ڈی کو نوٹس جاری کیا ہے۔ منیش سسودیا نے دونوں تفتیشی ایجنسیوں کی طرف سے درج کیس میں ضمانت کی درخواست کی ہے۔ اس معاملے کی اگلی سماعت اب 29 جولائی کو ہوگی۔

ای ڈی نے شراب پالیسی معاملے سے متعلق منی لانڈرنگ معاملے میں سسودیا کے خلاف مقدمہ درج کیا ہے، جبکہ سی بی آئی نے عآپ لیڈر بدعنوانی کے معاملے میں عآپ لیڈر کے خلاف مقدمہ درج کیا ہے۔ دہلی شراب پالیسی کو اب منسوخ کر دیا گیا ہے، لیکن اس میں مبینہ گھوٹالے کے الزام میں عآپ کے کئی رہنما جیل جا چکے ہیں۔ دہلی کے وزیر اعلی اور عام آدمی پارٹی کے سربراہ اروند کیجریوال بھی شراب پالیسی کیس میں جیل میں ہیں۔ راجیہ سبھا کے رکن سنجے سنگھ بھی اس معاملے میں جیل گئے تھے اور فی الحال ضمانت پر باہر ہیں۔

سپریم کورٹ میں جسٹس بی آر گوائی، جسٹس سنجے کرول اور جسٹس کے وی وشواناتھن کی بنچ نے منیش سسودیا کی ضمانت کی درخواست پر سماعت کی۔ عآپ لیڈر کی طرف سے پیش ہونے والے ایڈوکیٹ وویک جین نے دلیل دی کہ ان کے مؤکل گزشتہ 16 ماہ سے جیل میں ہے۔ ان کے خلاف کیس اسی مرحلے پر جہاں اکتوبر 2023 میں تھا۔

گزشتہ سال اکتوبر میں عدالت نے کہا تھا کہ اگر کیس آگے نہیں بڑھتا ہے تو سسودیا ضمانت کی اپیل کر سکتے ہیں۔ سسودیا کے وکیل کی دلیلیں سننے کے بعد عدالت عظمیٰ کی بنچ نے دونوں مرکزی جانچ ایجنسیوں یعنی ای ڈی اور سی بی آئی کو نوٹس جاری کیا اور ان سے جواب طلب کیا۔ عدالت نے اب اس معاملے پر اگلی سماعت 29 جولائی کو مقرر کی ہے۔

یاد رہے کہ منیش سسودیا کو ای ڈی نے گزشتہ سال 26 فروری کو 'پریوینشن آف منی لانڈرنگ ایکٹ' (پی ایم ایل اے) کے تحت گرفتار کیا تھا۔ وہ دہلی حکومت میں ایکسائز منسٹر تھے جس کی وجہ سے شراب پالیسی کیس کے تار ان تک پہنچ گئے۔ سسودیا نے اپنی گرفتاری کے بعد 28 فروری کو وزیر کے عہدے سے استعفیٰ دے دیا تھا۔ پچھلے سال ہی 9 مارچ کو سی بی آئی نے سسودیا کو شراب پالیسی معاملے سے متعلق بدعنوانی کے معاملے میں گرفتار کیا تھا۔