کلکتہ ہائی کورٹ کے ’دو منٹ کی خوشی‘ والے بیان پر عدالت عظمیٰ ناراض، ریاستی حکومت کو نوٹس جاری

عصمت دری کے ایک معاملے میں کلکتہ ہائی کورٹ کے فیصلے کی زبان پر سپریم کورٹ نے سخت اعتراض ظاہر کیا ہے۔ عدالت عظمیٰ نے کہا ہے کہ کلکتہ ہائی کورٹ کے فیصلے کے کچھ حصے بے حد قابل اعتراض اور نامناسب ہیں۔ دراصل کلکتہ ہائی کورٹ نے اپنے فیصلے میں کہا تھا کہ ’نو عمر بچیوں کو اپنی جنسی خواہشات کو قابو میں رکھنا چاہیے اور دو منٹ کی خوشی کے چکر میں نہیں پڑنا چاہیے‘۔ سپریم کورٹ نے اس طرح کی زبان کے استعمال کو قابل اعتراض بتایا ہے۔

سپریم کورٹ کا کہنا ہے کہ ججوں سے یہ امید نہیں کی جاتی کہ وہ اپنے ذاتی خیالات ظاہر کریں یا تقریر کریں۔ یہ پوری طرح سے آئین کی دفعہ 21 کے تحت نو عمر بچوں کے حقوق کی خلاف ورزی ہے۔ کلکتہ ہائی کورٹ کے ’دو منٹ کی خوشی‘ والے تبصرہ پر سپریم کورٹ نے از خود نوٹس لیا ہے اور اس معاملے پر سماعت کے بعد ریاستی حکومت و دیگر کو نوٹس جاری کر جواب مانگا ہے۔ سپریم کورٹ نے ریاستی حکومت سے پوچھا ہے کہ کیا وہ ہائی کورٹ کے فیصلے کے خلاف سماعت کرے گی؟

قابل ذکر ہے کہ گزشتہ دنوں پوکسو ایکٹ سے جڑے معاملے پر سماعت کرتے ہوئے کلکتہ ہائی کورٹ نے اپنے فیصلے میں کہا تھا کہ ’لڑکیوں کو اپنی جنسی خواہشات کو قابو میں رکھنا چاہیے اور دو منٹ کی خوشی کے پھیر میں نہیں پڑنا چاہیے‘۔ بنچ نے یہ بھی کہا تھا کہ ’جنسی خواہشات کو قابو میں کریں کیونکہ مشکل سے دو منٹ کا لطف حاصل کر لڑکیاں سماج کی نظروں میں گر جاتی ہیں‘۔ ہائی کورٹ نے اپنی بات کو آگے بڑھاتے ہوئے یہ بھی کہا تھا کہ ’یہ نو عمر لڑکیوں کی ذمہ داری ہے کہ وہ اپنے جسم کی سالمیت و وقار کو بنائے رکھیں‘۔ اپنے فیصلے میں عدالت نے لڑکوں کو بھی لڑکیوں کے وقار کا احترام کرنے کا مشورہ دیا اور کہا کہ ’لڑکوں کے دماغ کو اس طرح سے تربیت دی جانی چاہیے کہ وہ خواتین کی عزت کریں‘۔

واضح رہے کہ 20 سال کے نوجوان کو ٹرائل کورٹ نے اس کی نابالغ معشوقہ کے ساتھ جنسی تعلقات بنانے کے لیے 20 سال کی سزا سنائی تھی، جس کے خلاف نوجوان نے ہائی کورٹ میں اپیل داخل کی تھی۔ عرضی پر سماعت کے دوران عرضی دہندہ کی نابالغ معشوقہ نے اعتراف کیا کہ دونوں کے درمیان متفقہ طور پر جنسی رشتے قائم ہوئے تھے اور دونوں شادی کرنا چاہتے تھے۔ چونکہ متاثرہ نابالغ تھی، اس لیے عدالت نے پوکسو ایکٹ کے تحت لڑکے کو سزا سنائی تھی۔ ہائی کورٹ نے دلیلیں سننے کے بعد لڑکے کو رِہا کرنے کا حکم دیا تھا۔ اب ہائی کورٹ کے فیصلے کی زبان پر سپریم کورٹ نے سخت اعتراض ظاہر کر دیا ہے۔