سی بی آئی کی لاپروائیوں سے سپریم کورٹ ناراض، تیار کیا جائے گا رپورٹ کارڈ

سپریم کورٹ نے مرکزی جانچ بیورو یعنی سی بی آئی کے طریقہ کار پر سوال کھڑے کر دیئے ہیں۔ سی بی آئی کی لاپروائی سے سپریم کورٹ انتہائی ناراض ہے یہی وجہ ہے کہ ایک معاملے میں سی بی آئی کے ذریعہ 542 دنوں کی تاخیر کے بعد اپیل داخل کرنے پر سپریم کورٹ نے اس مرکزی ایجنسی کے کام کے طریقہ اور اس کی کارکردگی کا جائزہ لینے کا فیصلہ کیا ہے۔ سپریم کورٹ نے ایجنسی کے ذریعہ مقدمہ چلانے والے معاملوں میں سزا کی کم شرح کو دیکھتے ہوئے یہ قدم اٹھایا ہے۔

عدالت عظمیٰ نے سی بی آئی ڈائریکٹر کو ان معاملوں کی تعداد پیش کرنے کی ہدایت دی ہے جن میں ایجنسی ذیلی عدالتوں اور ہائی کورٹوں میں ملزمین کو قصوروار ٹھہرانے میں کامیاب رہی ہے۔ عدالت نے یہ بھی پوچھا ہے کہ ذیلی عدالتوں اور ہائی کورٹوں میں کتنے ٹرائل زیر التوا ہیں اور وہ کتنے وقت سے زیر التوا ہیں؟ عدالت نے یہ بھی پوچھا ہے کہ ڈائریکٹر قانونی کارروائی کے لیے محکمہ کو مضبوط کرنے کے لیے کیا اقدام کر رہے ہیں۔

جسٹس سنجے کشن کول کی صدارت والی بنچ نے کہا کہ ایجنسی کے لیے صرف معاملہ درج کرنا اور جانچ کرنا ہی کافی نہیں ہے، بلکہ یہ یقینی کرنا بھی ہے کہ کامیابی کے ساتھ الزام کو ثابت کیا جائے۔ عدالت نے پہلے کی سماعت میں کہا تھا کہ ’ذمہ داریوں کو نبھانے میں زبردست لاپروائی کی ایک داستان‘ ہے، جس کے نتیجہ کار عدالتوں میں معاملے درج کرنے میں بہت تاخیر ہوئی اور اس کے ڈائریکٹر سے جواب طلب کیا تھا۔

سی بی آئی کی جانب سے پیش ہوئے اے ایس جی سنجے جین نے دلیل دی کہ ہندوستان جیسے مشکل مقدمہ بازی نظام میں مقدمہ بازی میں کامیاب کی شرح کو مضبوطی طے کرنے والے اسباب میں سے ایک مانا جانا چاہیے، لیکن بنچ نے کہا کہ دنیا بھر میں ایک ہی پیمانہ پر عمل کیا جاتا ہے اور ایسی کوئی وجہ نہیں ہے کہ اسے سی بی آئی پر نافذ نہیں کیا جانا چاہیے۔ سپریم کورٹ نے کہا کہ ہم سی بی آئی کے ذریعہ نمٹائے جا رہے معاملوں کے بارے میں ڈاٹا چاہتے ہیں۔ سی بی آئی کتنے معاملوں میں مقدمہ چلا رہی ہے؟ مدت کار جس کے لیے مقدمے عدالتوں میں زیر التوا ہیں۔ ذیلی عدالتوں اور ہائی کورٹس میں سی بی آئی کی کامیابی شرح کیا ہے؟ عدالت نے کہا کہ ہم دیکھنا چاہتے ہیں کہ ایجنسی کی کامیابی کی شرح کیا ہے؟