نئی دہلی سے بہار کے گیا جا رہی مہابودھی ایکسپریس پر پتھراؤ، کئی مسافر زخمی

پٹنہ: مہابودھی ایکسپریس پر دیر شام گئے پتھراؤ کا سنگین معاملہ سامنے آیا ہے۔ رپورٹ کے مطابق یہ ٹرین نئی دہلی سے بہار کے گیا جا رہی تھی اور جب یہ الہ آباد (پریاگ راج) سے روانہ ہو گئی تو اس پر یمنا برج سے پہلے کچھ سماج دشمن عناصر نے پتھراؤ شروع کر دیا، جس میں کئی افراد زخمی ہو گئے۔ یہ واقعہ رات تقریباً 9 بجے پیش آیا۔

ذرائع کے مطابق الہ آباد میں مہابودھی ایکسپریس پر تقریباً 50 سے 60 پتھر پھینکے گئے جس سے کئی مسافروں کو چوٹیں آئی ہیں۔ ایس-3 کوچ میں کھڑکی کے اندر بھی کئی پتھر چلے گئے، جس سے کئی لوگ زخمی ہوئے ہیں۔ کوچ کے اندر چیخ و پکار کے بعد لوکو پائلٹ نے ٹرین روک دی۔ ٹرین میں موجود آر پی ایف جوان جب تک پتھر پھینکنے والوں کو پکڑ پاتے وہ موقع سے فرار ہو گئے۔

ٹرین پر پتھراؤ کی اطلاع ملتے ہی الہ آباد جنکشن سے آر پی ایف کے سب انسپکٹر سروج کثیر تعداد میں فورس کے ساتھ موقع پر پہنچے لیکن اس وقت تک ٹرین روانہ ہو چکی تھی۔ آر پی ایف ٹیم نے سرچ آپریشن چلا کر 3 مشتبہ لوگوں کو حراست میں لے لیا ہے۔ وہیں ٹرین کو مرزا پور اسٹیشن پر روکا گیا۔ یہاں بیان درج کرانے کے ساتھ ہی زخمی مسافروں کا علاج کرایا گیا۔

بیگوسرائے کے رہنے والے زخمی ریل مسافر سجیت کمار نے بتایا کہ وہ کھڑکی کے پاس بیٹھے تھے تبھی اچانک پتھر پھینکے جانے لگے۔ ان کے سر اور گردن میں شدید چوٹیں آئی ہیں۔ کئی اور مسافروں کو بھی چوٹیں آئی ہیں۔ اس معاملے میں نارتھ سینٹرل ریلوے کے چیف پبلک ریلیشن آفیسر ششی کانت ترپاٹھی نے بتایا کہ ریلوے انتظامیہ نے اس واقعہ کو سنگین مانتے ہوئے آر پی ایف کو سخت کارروائی کی ہدایت دی ہے۔