اسپیکر اوم برلا کی نصیحت- الزام عائد کرنے کے لئے ٹوئٹر کا سہارا نہ لیں، مہوا موئترا کا جواب- ’پیارا سا ٹوئٹ کروں گی!‘

نئی دہلی: لوک سبھا اسپیکر اوم برلا نے جمعرات کو ایوان میں ٹی ایم سی کی رکن اسمبلی مہوا موئترا کو مشورہ دیا کہ وہ اسپیکر پر الزام لگانے کے لیے ٹوئٹر پر نہ جائیں۔ لوک سبھا اسپیکر نے اراکین پر زور دیا کہ وہ ایوان میں بولنے کا موقع نہ ملنے کے بارے میں سوشل میڈیا پر اپنی شکایات کا اظہار نہ کریں۔ اس کے بعد مہوا موئترا نے ایک اور ٹویٹ کیا۔ اوم برلا کو ٹیگ کرتے ہوئے مہوا نے لکھا کہ آج مجھے ایک ضمنی سوال پوچھنے کا موقع فراہم کرنے کے لیے اسپیکر صاحاب کا شکریہ۔

ٹی ایم سی کی ایم پی مہوا موئترا نے ٹوئٹر پر لکھا، ’’محترم اسپیکر نے آج کھولے دل سے مجھے ایک ضمنی سوال پوچھنے کا موقع دیا۔ میں نے ان سے شکریہ ادا کرنے کے لیے ایک خوبصورت ٹوئٹ کرنے کا وعدہ کیا تھا۔ شکریہ جناب!"

خیال رہے کہ جمعرات کو لوک سبھا اسپیکر اوم برلا نے ترنمول کانگریس کی رکن اسمبلی مہوا موئترا کو سوالیہ وقت کے دوران شہری ہوابازی کے وزیر جیوتیرادتیہ سندھیا سے سوال پوچھنے کا موقع دیا اور ان کے سوال پوچھنے کے بعد جیسے ہی مہوا موئترا نیچے بیٹھیں تو سندھیا کے جواب دینے سے پہلے ہی برلا نے ان کا نام لیے بغیر ٹوئٹر سے متعلق ہدایت دے ڈالی۔ اس کے بعد سندھیا نے اپنا جواب دیا۔

رواں سال فروری میں بجٹ اجلاس کے دوران مہوا موئترا نے پریزائیڈنگ افسر پر انہیں بولنے کا موقع نہ دینے پر کئی الزامات عائد کئے تھے اور اس کے تعلق سے ٹوئٹر پر بھی کئی باتیں لکھ دی تھیں۔