نیشنل ہیرالڈ معاملہ: سونیا گاندھی کی ای ڈی میں آج ہوگی پیشی، جانیں اس معاملہ میں اب تک کیا کیا ہوا؟

نئی دہلی: راہل گاندھی کے بعد انفورسمنٹ ڈائریکٹوریٹ (ای ڈی) کی ٹیم آج سونیا گاندھی سے پوچھ گچھ کرنے جا رہی ہے۔ کانگریس لیڈران پر الزام ہے کہ انہوں نے دھوکہ دہی اور رقم کے غلط استعمال کے ذریعے خسارے میں جانے والے نیشنل ہیرالڈ اخبار کی ملکیت پر قبضہ کیا ہے۔ سونیا گاندھی صبح 11.30 بجے گھر سے نکلیں گی اور 11.45 بجے ای ڈی کے دفتر پہنچیں گی۔ جہاں ان سے نیشنل ہیرالڈ اخبار سے متعلق منی لانڈرنگ کیس میں پوچھ گچھ کی جائے گی۔

صحت کے پیش نظر سونیا گاندھی کو انفورسمنٹ ڈائریکٹوریٹ سے خصوصی چھوٹ ملی ہے۔ ضروری ادویات لینے کے لیے حسب ضرورت وقفہ دیا جائے گا۔ راہل اور پرینکا گاندھی ای ڈی کے دفتر تک سونیا کو چھوڑنے جا سکتے ہیں۔

نیشنل ہیرالڈ کیس میں اب تک کیا کیا ہوا؟

اس معاملہ میں یکم نومبر 2012 کو بی جے پی لیڈر سبرامنیم سوامی نے مقدمہ درج کرایا۔ 26 جون 2014 کو عدالت نے سونیا گاندھی، راہل گاندھی سمیت تمام ملزمان کے خلاف سمن جاری کیا۔ یکم اگست 2014 کو انفورسمنٹ ڈائریکٹوریٹ نے کیس درج کیا۔ 19 دسمبر 2015 کو تمام ملزمین کو دہلی کی پٹیالہ ہاؤس کورٹ سے ضمانت مل گئی۔ 2016 سپریم کورٹ نے کانگریس قائدین کے خلاف کارروائی کو منسوخ کرنے سے انکار کر دیا۔ ستمبر 2018 میں دہلی ہائی کورٹ نے سونیا اور راہل کی طرف سے انکم ٹیکس ڈیپارٹمنٹ کے نوٹس کے خلاف دائر درخواست کو خارج کر دیا تھا۔ سونیا سے پوچھ گچھ کے لیے 2 جون کو سمن جاری کیا گیا تھا۔

راہل گاندھی سے تقریباً 50 گھنٹے تک پوچھ گچھ کی جا چکی ہے۔ سونیا گاندھی سے آج پوچھ گچھ ہوگی۔ سونیا گاندھی کو 8 جون کو ای ڈی کے سامنے پیش ہونا تھا لیکن خرابی صحت کے باعث وہ پیش نہ ہو سکیں۔ جہاں ای ڈی سونیا گاندھی سے پوچھ گچھ کرنے کی تیاری کر رہی ہے، وہیں کانگریس لیڈر اور کارکن سونیا کے ساتھ یکجہتی کا اظہار کرنے کے لیے سڑک پر نکل رہے ہیں۔

کانگریس پارٹی کی جانب سے تین محاذوں پر احتجاج کیا جائے گا۔ کانگریس کے ارکان پارلیمنٹ ہاؤس کے احاطہ میں گاندھی مجسمہ کے سامنے احتجاج کریں گے۔ قائدین اور کارکنان کانگریس ہیڈکوارٹر سے ای ڈی آفس تک مارچ کریں گے۔ کانگریس کارکنان مختلف ریاستوں میں احتجاج کریں گے۔

دریں اثنا، کانگریس کے جنرل سکریٹری جے رام رمیش نے ٹوئٹ کیا ہے کہ مودی-شاہ کی جوڑی کی طرف سے ہماری اعلیٰ قیادت کے خلاف جس طرح سے سیاسی انتقامی کارروائیاں جاری ہیں، اس کے خلاف کانگریس پارٹی اپنی لیڈر سونیا گاندھی کے ساتھ اجتماعی یکجہتی کا اظہار کرتے ہوئے ملک بھر میں مظاہرہ کرے گی۔ اس سے پہلے راہل گاندھی سے پوچھ گچھ کے دوران بھی کانگریس کارکنان سڑک پر اترے تھے، لہذا دہلی پولیس نے پوری تیاری کر لی ہے۔ سونیا گاندھی سے پوچھ گچھ کے پیش نظر دہلی کی سیکورٹی بڑھا دی گئی ہے اور کسی بھی صورتحال سے نمٹنے کے لیے جگہ جگہ بیریکیڈنگ کی گئی ہے۔