آپسی اختلافات دور کرنے کا وقت، کورونا کے خلاف یکجا ہو کر لڑنا ہوگا: سونیا گاندھی

نئی دہلی: ملک میں کورونا کی ابتر صورت حال کے درمیان کانگریس صدر سونیا گاندھی نے کہا ہے کہ سیاسی جماعت کے لیڈران کو اپنے اختلافات سے بالاتر ہونے اور ایک قوم کے طور پر کورونا سے لڑنے کے لئے یکجا ہونے کی ضرورت ہے۔ سونیا گاندھی نے کہا کہ مودی حکومت کو سمجھنا چاہیے کہ یہ لڑائی کورونا کے خلاف ہے نہ کہ کانگریس اور دوسری سیاسی جماعتوں کے خلاف۔

انڈین ایکسپریس کو دیئے گئے انٹریو میں سونیا گاندھی نے کہا کہ کانگریس ہمیشہ سے ہی حکومت سے تعاون کے لئے تیار ہے۔ کورونا سے جو حالات ہیں اس میں پوری طرح سسٹم (نظام) کی ناکامی نظر آتی ہے۔ سونیا گاندھی نے کہا کہ ’’میرا خیال ہے کہ کورونا سے لڑتے وقت اس لڑائی کو ’ہماری بمقامہ آپ کی‘ نہیں بلکہ ’ہماری بمقابلہ کورونا وائرس‘ ہونا چاہیے۔‘‘

کانگریس صدر سونیا گاندھی نے کہا کہ اس مشکلات سے بھرے وقت میں سیاسی اختلافات کو درکنار کرنا ضروری ہے، آفت کے وقت میں پہلے بھی ملک ایک ساتھ کھڑا ہوا ہے۔ ایک اپوزیشن جماعت ہونے کے ناطے کانگریس کی جانب سے لگاتار حکومت پر دباؤ بنایا جائے گا، اس وقت کورونا سے دفاع سے اہم کوئی اور کام نہیں ہے۔ انہوں نے کہا کہ مشکل وقت میں کورونا سے نمٹنے میں حکومت کی کئی جگہ خامیاں نظر آ رہی ہیں اور حزب اختلاف جماعت ہونے کے ناطے ہمارے کاندھوں پر بھی ذمہ داری ہے۔

سونیا گاندھی نے کہا کہ اس مشکل وقت میں حکومت کو آکسیجن کی دستیابی، ادویات کی کالا بازاری پر روک لگانے، بیڈ کا انتظام کرنے، کورونا کی جانچ کرنے اور متاثرہ افراد کی مالی امداد کرنے پر حکومت کو فوری توجہ دینی چاہیے۔ کورونا کے مشکل وقت میں خامیوں کو گنانے اور دوسری مجبوریوں سے چھٹکارا حاصل کر جنگی پیمانے پر کام کرنے کی ضرورت ہے۔