منی پور میں حالات پھر خراب، 3 افراد کا گولی مار کر قتل، کئی گاڑیاں نذرِ آتش، 5 ضلعوں میں کرفیو نافذ

منی پور میں ایک بار پھر حالات خراب ہو گئے ہیں۔ نئے سال کے پہلے دن (پیر) تھوبل ضلع میں تین لوگوں کا گولی مار کر قتل کر دیا گیا۔ اس دوران پانچ دیگر افراد زخمی بھی ہوئے ہیں۔ اس تازہ تشدد کے بعد مقامی افراد میں شدید ناراضگی دیکھنے کو مل رہی ہے۔ حالات کو بے قابو ہونے سے بچانے کے لیے پانچ اضلاع میں کرفیو نافذ کر دیا گیا ہے۔

پولیس نے تازہ قتل واقعہ کے بارے میں بتایا کہ بندوق برداروں کی ابھی تک شناخت نہیں ہو سکی ہے۔ مسلح افراد عجیب لباس میں للونگ چنگجاؤ علاقہ پہنچے تھے جہاں مقامی لوگوں پر انھوں نے گولی باری کی۔ اس واقعہ میں تین لوگوں کی موت ہو گئی۔ زخمیوں کو علاج کے مقصد سے فوراً اسپتال میں داخل کرایا گیا۔

فائرنگ واقعہ کے بعد مقامی لوگوں میں شدید ناراضگی پھیل گئی اور بڑی تعداد میں لوگ سڑک پر نکل گئے۔ ناراض لوگوں نے کئی گاڑیوں کو نذرِ آتش بھی کر دیا۔ ابھی تک یہ واضح نہیں ہو سکا ہے کہ جن گاڑیوں میں آگ لگائی گئی، وہ کس کی تھی۔ اس درمیان افسران نے مطلع کیا ہے کہ تازہ تشدد کے بعد تھوبل، امپھال مشرق، امپھال مغرب، کاکچنگ اور بشنوپور ضلعوں میں کرفیو نافذ کر دیا گیا ہے۔

تازہ تشدد کے بعد وزیر اعلیٰ این بیرین سنگھ کا ایک ویڈیو پیغام سامنے آیا ہے جس میں انھوں نے پرتشدد واقعہ کی مذمت کی ہے۔ انھوں نے مقامی لوگوں سے امن و امان بنائے رکھنے کی اپیل بھی کی ہے۔ واقعہ کے تعلق سے وزیر اعلیٰ نے کہا کہ پولیس حملے میں شامل مشتبہ افراد کو گرفتار کرنے کی لگاتار کوشش کر رہی ہے۔ جلد ہی قصوروار پولیس کی گرفت میں ہوں گے اور انھیں قانون کے مطابق سخت سے سخت سزا دی جائے گی۔

واضح رہے کہ گزشتہ سال 3 مئی کو منی پور میں نسلی تشدد کا آغاز ہوا تھا، اس کے بعد سے حالات ابھی تک بہتر نہیں ہوئے ہیں۔ اب تک 180 سے زائد افراد کی موت ہو چکی ہے اور سینکڑوں افراد زخمی ہوئے ہیں۔ میتئی اور کوکی طبقہ کے درمیان تصادم کی وجہ سے یہ مشکل حالات پیدا ہوئے ہیں۔ دراصل منی پور کی آبادی میں میتئی لوگوں کی تعداد تقریباً 53 فیصد ہے اور وہ بیشتر امپھال وادی میں رہتے ہیں۔ قبائلی ناگا اور کوکی 44 فیصد سے کچھ زیادہ ہیں جو پہاڑی ضلعوں میں رہتے ہیں۔ رہ رہ کر ان دونوں طبقات میں تصادم کی خبریں سامنے آتی رہتی ہیں۔