اعظم خان نے سپریم کورٹ میں داخل کی درخواست ضمانت، آئندہ ہفتہ ہوگی سماعت

لکھنؤ: سیتاپور جیل میں قید سماجوادی پارٹی کے قدآور لیڈر اور سابق وزیر اعظم خان نے عبوری ضمانت کے لئے سپریم کورت میں عرضی داخل کی ہے۔ رپورٹ کے مطابق عدالت عظمیٰ میں ان کی اس عرضی پر آئندہ ہفتہ سماعت کی جائے گی۔

اعظم خان کی جانب سے عدالت میں پیش کی گئی دلیل میں کہا گیا ہے کہ الہ آباد ہائی کورٹ میں صرف ایک معاملہ میں ان کی ضمانت زیر التوا ہے۔ فیصلہ محفوظ کیے ہوئے ساڑھے چار ماہ سے زائد کا عرصہ گزر جانے کے باوجود عدالت نے ابھی تک اپنا فیصلہ نہیں سنایا ہے۔ خیال رہے کہ اعظم خان کی درخواست ضمانت پر 4 دسمبر کو سماعت مکمل ہونے کے بعد الہ آباد ہائی کورٹ نے اپنا فیصلہ محفوظ رکھ لیا تھا۔ ہائی کورٹ کا فیصلہ نہ آنے کی وجہ سے اعظم خان کو جیل میں رہنا پڑا۔

اعظم خان نے سپریم کورٹ سے استدعا کی ہے کہ جب تک ہائی کورٹ کی جانب سے فیصلے نہیں سنایا جاتا اس وقت تک ان کی عبوری ضمانت منظور کر لی جائے اور اگر سپریم کورٹ اس معاملے میں براہ راست مداخلت نہیں کرنا چاہتا تو ہائی کورٹ کو فیصلہ سنانے کی ہدایت کی جائے۔ رپورٹ کے مطابق ہائی کورٹ کا فیصلہ جلد آنے کے لیے اعظم نے قانونی راستہ اختیار کیا ہے۔ اگلی سماعت میں سپریم کورٹ اعظم خان کی درخواست ضمانت پر فیصلہ سنانے کے لیے الہ آباد ہائی کورٹ کو کوئی بھی ہدایت جاری کر سکتا ہے۔

غورطلب ہے کہ اعظم خان کے خلاف کل 87 مقدمات درج ہیں۔ ایک کے علاوہ باقی تمام کیسوں میں ان کی درخواست ضمانت منظور ہو چکی ہے۔ اگر اس آخری معاملہ میں ضمانت مل جائے تو اعظم خان جیل سے رہا ہو جائیں گے۔ یہ معاملہ وقف بورڈ کی زمین پر قبضے کے تنازع سے جڑا ہوا ہے۔