سدھارتھ نگر: شر پسندوں نے ’ملنگ بابا کا مزار‘ توڑا، سات ملزمین گرفتار

سدھارتھ نگر: اترپردیش میں ضلع سدھارتھ نگر کے بھوانی گنج علاقے میں واقع ’ملنگ بابا کے مزار‘ کو سماج دشمن عناصر کی جانب سے توڑے جانے اور اس کی تصاویر کو ہندو وادیوں کی طرف سے سوشل میڈیا پر شیئر کیے جانے کے بعد علاقہ کا ماحول کشیدہ ہو گیا ہے۔ پولس نے فوراً کارروائی کرتے ہوئے واردات میں شامل سات ملزمان کو گرفتار کر لیا ہے۔ تاہم پولس حالات پر نظر بنائے ہوئے ہے اور سوشل میڈیا کی نگرانی کی جا رہی ہے۔

پولس ترجمان نے منگل کے روز بتایا کہ سماج دشمن عناصر نے گزشتہ شب بڑھنی چاپھا واقع ملنگ بابا کے مزار کو نقصان پہنچایا۔ انہوں نے بتایا کہ اطلاع ملنے پر ضلع انتظامیہ نے ٹوٹی مزار کی مرمت کرا دی ہے۔

ہندی اخبار ’امر اُجالا‘ کی رپورٹ کے مطبابق مزار کو نقصان پہنچانے کی واردات پیر کی رات آٹھ سے نو بجے کے درمیان انجام دی گئی۔ جیسے ہی لوگوں کو اس کی اطلاع ملی ماحول کشیدہ ہو گیا۔ اس کے بعد ایک ہندو تنظیم کے رہنما نے اس کی تصاویر کو سوشل میڈیا پر شیئر کر دیا۔ میڈیا رپورٹوں کے مطابق معاملہ پولس کے پاس پہنچنے سے پہلے ہی پوسٹ کو ڈلیٹ کر دیا گیا۔ اس کے بعد جیسے ہی پولس کو معلومات حاصل ہوئی۔ اس نے چار ملزمان کو گرفتار کر لیا ہے۔

ڈومیریاگنج، پتھرا، تریلوک پور وغیرہ تھانوں کی فورس کو احتیاط کے طور پر گاؤں بڑھنی چاپھا کے علاوہ آس پاس کے کئی گاؤں میں تعینات کیا گیا ہے۔ ایس پی وجے ڈھُل کا کہنا ہےکہ مذہبی مقام کی فوری طور پر مرمت کرا دی گئی ہے اور سوشل میڈیا پر پولس کی ٹیم نظر بنائے ہوئے ہے۔