شرمناک! اتر پردیش کے سنبھل میں ضمانت پر رِہا ملزم نے نابالغ متاثرہ کا گولی مار کر کیا قتل

اتر پردیش کے سنبھل میں ایک انتہائی شرمناک اور دل دہلا دینے والا واقعہ سامنے آیا ہے۔ عصمت دری کے ایک ملزم، جو کہ ضمانت پر جیل سے باہر آیا تھا، اس نے عصمت دری متاثرہ کا گولی مار کر قتل کر دیا ہے۔ پولیس نے ملزم اور اس کے ساتھی کو گرفتار کر اس معاملے کی تحقیقات شروع کر دی ہے۔

ایڈیشنل پولیس سپرنٹنڈنٹ سریش چندر کا کہنا ہے کہ ’’کیلا دیوی تھانہ حلقہ میں 18 ستمبر کی شب ایک نابالغ لڑکی کا گولی مار کر قتل کر دیا گیا تھا۔ اس معاملہ میں دو نوجوانوں کے خلاف مقدمہ درج کیا گیا ہے۔‘‘ انھوں نے مزید بتایا کہ اس حادثہ میں ایک ملزم رنکو (20 سال) عصمت دری کا ملزم ہے۔ عصمت دری کا یہ معاملہ غازی آباد کے ایک پولیس تھانہ میں فروری ماہ میں درج کیا گیا تھا اور ملزم رواں ماہ کے شروع میں ضمانت پر جیل سے باہر آیا تھا۔

متاثرہ کنبہ کے ذریعہ پولیس سے کی گئی شکایت کے مطابق نابالغ لڑکی جب اپنے بھائی اور ماں کے ساتھ موٹر سائیکل پر گھر واپس آ رہی تھی، تبھی اس کا گولی مار کر قتل کر دیا گیا۔ کنبہ کا الزام ہے کہ رنکو اور اس کے ساتھی نے انھیں راستے میں روکا اور گولی چلا دی۔ پولیس افسر نے کہا کہ ’’ہم گولی چلانے کے واقعہ کے سبھی پہلوؤں کی جانچ کر رہے ہیں۔ اس علاقے کا سی سی ٹی وی فوٹیج بھی حاصل کیا جا رہا ہے۔‘‘