مہاراشٹر میں 11 سیٹوں پر ایم ایل سی الیکشن کے خلاف شیوسینا-یو بی ٹی جائے گی سپریم کورٹ

ادھو ٹھاکرے کی شیو سینا (یو بی ٹی) قانون ساز کونسل کی 11 نشستوں کے انتخابات پر روک لگانے کے لیے سپریم کورٹ سے رجوع کر سکتی ہے۔ شیو سینا ٹھاکرے گروپ کا دعویٰ ہے کہ جب اسپیکر کے ذریعہ ایم ایل ایز کو نااہل قرار دینے کے فیصلے کے خلاف سپریم کورٹ میں سماعت چل رہی ہے تو قانون ساز کونسل کے انتخابات کا انعقاد غیر آئینی ہے۔ اس لیے شیو سینا-یو بی ٹی قانون ساز کونسل کی 11 نشستوں کے لیے 12 جولائی کو ہونے والے انتخابات کو ملتوی کرنے کا مطالبہ کر سکتی ہے۔

نیوز پورٹل ’اے بی پی نیوز‘ کے مطابق چونکہ ایم ایل اے کی نااہلی سے متعلق سپریم کورٹ میں کیس چل رہا ہے اس لیے شیو سینا ٹھاکرے گروپ کا دعویٰ ہے کہ ان ایم ایل ایز کے لیے قانون ساز کونسل کے انتخابات میں ووٹ دینا اور قانون ساز کونسل کے ایم ایل ایز کا انتخاب کرنا غیر آئینی ہے۔ شیو سینا ٹھاکرے گروپ کی جانب سے ایک سوال یہ بھی اٹھایا جا رہا ہے کہ شیو سینا میں پھوٹ کے بعد کچھ ایم ایل ایز کے حلف نامے سپریم کورٹ میں ہیں۔ ان میں اس بات کی گواہی دی گئی ہے کہ وہ شیو سینا ٹھاکرے گروپ سے تعلق رکھتے ہیں۔ اگر وہ شامل ہوتے ہیں تو انہیں قانون ساز کونسل کے انتخابات میں ووٹ کا حق کیسے دیا جائے گا۔ اس ضمن میں آج قانونی ماہرین کی میٹنگ ہو رہی ہے اور شیو سینا ٹھاکرے گروپ کی جانب سے عدالت جانے کی تیاریاں کی جاری ہیں۔

واضح رہے کہ اس سال کے آخر میں ہونے والے اسمبلی انتخابات سے پہلے مہاراشٹر قانون ساز کونسل کی 11 سیٹوں کے لیے دو سالہ انتخابات 12 جولائی کو ہوں گے۔ الیکشن کمیشن نے منگل کو یہ اعلان کیا ہے۔ ممبران اسمبلی کے ذریعہ منتخب کردہ 11 قانون ساز کونسل ممبران (ایم ایل سی) کی چھ سالہ میعاد 27 جولائی کو ختم ہو جائے گی۔