ہندوستان اور ویسٹ انڈیز کے درمیان پہلا یک روزہ میچ آج، روہت-وراٹ کو آرام

گزشتہ کچھ مہینوں میں بین الاقوامی کرکٹ میں مصروف پروگرام کو لے کر سبھی ممالک کے لیے ہر دو فریقی سیریز میں اپنے بہترین کھلاڑیوں کو باہر کرنا ایک چیلنج بن گیا ہے۔ خصوصاً اس سال ہونے والے ٹی-20 عالمی کپ کو لے کر ٹیموں نے اپنے بنچ اسٹرینتھ کو آزمانا شروع کر دیا ہے۔ کوئنس پارک اوول میں جمعہ سے شروع ہو رہی ویسٹ انڈیز کے خلاف تین میچوں کی یک روزہ سیریز میں ہندوستان کے مستقل کپتان روہت شرما، وراٹ کوہلی، رشبھ پنت، ہاردک پانڈیا اور بمراہ کو آرام دیا گیا ہے۔

کپتانی کی ذمہ داری اب سلامی بلے باز شکھر دھون کو سونپی گئی ہے جو اس سال ہندوستانی ٹیم کی قیادت کرنے والے ساتویں کپتان ہوں گے۔ اتنے سارے اہم کھلاڑیوں کے آرام کرنے کے باوجود دھون کی قیادت والی مہمان ٹیم ویسٹ انڈیز کے خلاف مضبوطی کے ساتھ اترے گی۔ اس ٹیم میں ایشان کشن، ریتوراج گائیکواڈ، شبھمن گل، سنجو سیمسن، شریئس ایر اور دیپک ہڈا جیسے کھلاڑی شامل ہیں جنھیں یک روزہ کرکٹ میں اپنے ہنر کا مظاہرہ کرنے کا شاندار موقع ملے گا۔

ویسٹ انڈیز کے خراب بلے بازی آرڈر کو دیکھتے ہوئے ہندوستان کے پاس اپنے گیندبازی اٹیک میں شامل کرنے کے لیے کئی متبادل موجود ہیں۔ یک روزہ میچ میں نائب کپتان رویندر جڈیجہ کے اسپن محکمہ میں لیگ اسپنر یجویندر چہل کی شمولیت یقینی معلوم پڑ رہی ہے۔ ہاردک پانڈیا کی غیر موجودگی میں شاردل ٹھاکر کو آل راؤنڈر کی شکل میں موقع دیا جا سکتا ہے۔ اگر عرش دیپ سنگھ پیٹ کی تکلیف سے باہر نہیں نکل پائے ہیں تو پرسدھ کرشنا اور محمد سراج یا آویش خان میں سے دو گیندبازوں کو موقع مل سکتا ہے۔