شیعہ عالم دین مولانا کلب صادق نے تبلیغی جماعت کے حق میں بلند کی آواز

مبینہ طور پر کورونا وائرس پھیلانے کے الزامات کا سامنا کر رہے تبلیغی جماعت کے حق میں اب کھل کر آوازیں اٹھنے لگی ہیں۔ مشہور و معروف شیعہ عالم دین مولانا کلب صادق نے بھی تبلیغی جماعت کے اراکین کو ملک کا وفادار اور ہمدرد ٹھہراتے ہوئے کہا کہ میڈیا نے انھیں غلط طریقے سے پیش کیا جو مناسب نہیں۔ انھوں نے کہا کہ "میڈیا سے ہم کو شکایت ہے۔ وہ ہمارے بھائی ہیں، لیکن میڈیا اگر بدعنوان ہو جائے اور لوگون کو ملانے کی جگہ لوگوں کو لڑانے کی کوشش کرے تو یہ بدقسمتی کی بات ہے۔"

مولانا کلب صادق نے ایک بات چیت کے دوران کہا کہ "تبلیغی جماعت سے میرا کوئی رشتہ نہیں ہے، اس جماعت کے چیف (مولانا سعد) کو میں جانتا بھی نہیں کہ وہ کون ہیں۔ لیکن یہ سچ ہے کہ انھوں نے کبھی لڑنے کی اور مارنے کاٹنے کی بات نہیں کی ہے۔ وہ اس ملک کے وفادار ہیں۔" وہ مزید کہتے ہیں کہ "تبلیغی جماعت کو لے کر اتنا ہنگامہ پیدا کیا گیا، لیکن اب دھیرے دھیرے سبھی چھوٹ رہے ہیں۔ کہا گیا کہ وہ کورونا پھیلا رہے ہیں، لیکن یہ باتیں بے بنیاد ہیں۔ وہ تو سیدھے سادے لوگ ہیں۔ تبلیغی جماعت کے لوگوں کا تو ہمیشہ یہی کہنا ہے کہ آپ اچھے بنیے۔"

شیعہ عالم دین نے ہندوستان میں سبھی مذاہب کے لوگوں کے لیے بہتر ماحول بنائے جانے کی پیروی کرتے ہوئے کہا کہ "یہ ملک ہمارا ہے۔ یہ مسلمانوں کا ہے، ہندوؤں کا ہے، سکھوں کا ہے، یہ سب کا ملک ہے۔ ہم کو ایسی بات نہیں کرنی چاہے کہ جس سے اس ملک کے اتحاد پر اثر پڑے اور یہاں کے عوام میں اختلاف اور انتشار پیدا ہو۔ کورونا یہ نہیں دیکھتا کہ کون ہندو ہے یا مسلم ہے، یا پھر شیعہ ہے یا سنی ہے۔ وہ تو بس ایک ہوا ہے جو چلے گی تو کسی پر بھی جھپٹ پڑے گی۔"