شیعہ عالمِ دین مولانا کلب صادق کا طویل علالت کے بعد انتقال، ہر سو غم کا ماحول

آل انڈیا مسلم پرسنل لاء بورڈ کے نائب چیئرمین اور شیعہ عالم دین مولانا ڈاکٹر کلب صادق کا منگل کی شب انتقال ہو گیا۔ اس خبر سے ہر سو غم کا ماحول چھا گیا اور ان کے اعلیٰ درجات کے لیے دعاؤں کا سلسلہ شروع ہو گیا۔ قابل ذکر ہے کہ گزشتہ 17 نومبر کو سانس لینے میں دقت اور نمونیا کی شکایت کے بعد انھیں اسپتال میں داخل کرایا گیا تھا۔ جانچ کے دوران پتہ چلا کہ نمونیا کے ساتھ ہی وہ یو ٹی آئی اور سیپٹک شاک میں مبتلا ہیں۔

ویسے مولانا کلب صادق طویل مدت سے علیل تھے اور کئی بار وہ اسپتال سے صحت مند ہو کر باہر آئے تھے، لیکن اس مرتبہ وہ صحت مند نہیں ہو سکے۔ منگل کے روز 10 بجے شب انھوں نے آخری سانس لی۔ مولانا کلب صادق کے انتقال کی خبر ان کے بیٹے سبطین نوری نے دی۔

مولانا کلب صادق کے انتقال کی خبر دیتے ہوئے ان کے بیٹے کا ایک ویڈیو سامنے آیا ہے جس میں کہا گیا ہے کہ ’’قوم یتیم ہو گئی، قوم یتیم ہو گئی، قوم کا سرپرست چلا گیا۔ آپ کے قوم کے حکیم امت اللہ کی بارگاہ میں چلے گئے۔ آپ کوئی آپ سے نہیں کہے گا کہ تعلیم حاصل کرو، کوئی آپ کے بچے کو پڑھوائے گا نہیں۔ ہندو- مسلم اتحاد، شیعہ-سنی اتحاد کی بات کرنے والا اب کوئی نہیں۔‘‘