نوح فسادات میں گروکل کو بچانے والے بھادس کے سرپنچ شوکت علی ’امن ایوارڈ‘ سے سرفراز

نوح تشدد کے دوران بھادس گاؤں میں فسادیوں کے ہجوم سے لڑ کر گروکل کی حفاظت کرنے کے لیے ملک بھر میں سراہے جانے والے بھادس گاؤں کے سرپنچ شوکت علی کو انتظامیہ اور مقامی ہندو برادری نے یوم آزادی کے موقع پر اعزاز سے نوازا ہے۔ شوکت علی تشدد کے دن گاؤں والوں کے ساتھ لاٹھیاں لے کر فسادیوں کے سامنے کھڑے ہو گئے تھے۔ اس گاؤں کی 95 فیصد آبادی مسلمانوں کی ہے۔ بتایا جا رہا ہے کہ فسادیوں نے اپنے چہروں پر کپڑا باندھ رکھا تھا اور ان کی موٹر سائیکل کی نمبر پلیٹ اتاری ہوئی تھی۔ 400-500 فسادیوں کے اس ہجوم نے برے ارادے سے گروکل پر حملہ کیا، تو شوکت علی اپنے ساتھیوں کے ساتھ ان سے بھڑ گئے، مقامی مسلمانوں کو گروکل کے اطراف سے لڑتے دیکھ کر فسادی واپس چلے گئے۔ چند گھنٹوں بعد فسادیوں نے پھر گروکل پر حملہ کیا لیکن سرپنچ شوکت علی نے دوبارہ انہیں کھدیڑ دیا۔ حالات کی سنگینی کو دیکھتے ہوئے شوکت علی مقامی دیہاتیوں کو ساتھ لے کر 24 گھنٹے گروکل میں رہے۔ بھادس کے گروکل میں 30 طلبا رہتے ہیں اور ہندو مذہب کی تعلیم حاصل کرتے ہیں۔

سرپنچ شوکت علی کو ان کے کام کے لیے مقامی ہندو سماج اور انتظامیہ نے اعزاز سے نوازا ہے۔ آچاریہ مہارشی دیانند گروکل اور گوشالہ کے ڈائریکٹر آچاریہ ترون کے مطابق ’’تشدد کے دن 12 بجے تک سب کچھ پرسکون تھا لیکن اس کے بعد کئی جگہوں سے منفی خبریں آئیں، خوف پھیل گیا کیونکہ یہاں ہندو آبادی صرف 5 فیصد ہے، حالانکہ اس کے بعد سرپنچ جی آئے اور انہوں نے کہا کہ ہمیں پریشان ہونے کی ضرورت نہیں ہے۔ طالب علم اور ہم گروکل کے اندر محفوظ ہیں، پھر انہوں نے اور ہم دونوں نے گاؤں کے کچھ لوگوں کو یہاں بلایا۔ سرپنچ جی باہر گروکل کے دروازے پر بیٹھ گئے، جب فسادیوں کا ہجوم 2 بار آیا تو بھادس گاؤں کے مقامی لوگوں نے سرپنچ شوکت علی کی قیادت میں انہیں اندر نہیں آنے دیا۔ ہجوم میں شامل لوگ مقامی نہیں تھے۔ ایسا لگتا تھا کہ وہ راجستھان کی سرحد سے آئے ہوں گے۔‘‘

نگینہ علاقہ میں پڑنے والے بھادس کے سرپنچ کو فیروز پور جھرکہ کے سب ڈویژنل افسر ڈاکٹر چنار چہل کے ہاتھوں فرقہ وارانہ ہم آہنگی قائم کرنے اور گروکل کی حفاظت کے لیے بہترین شہری ایوارڈ سے نوازا گیا ہے۔ اس دوران ڈاکٹر چنار چہل نے سرپنچ شوکت علی کی بہت تعریف کی۔ بھداس میں پرنسپل رہے نانک چند نے بھی شوکت علی کی تعریف کرتے ہوئے کہا کہ انہوں نے نہ صرف گروکل کی حفاظت کی بلکہ پورے علاقے کو آگ میں جلنے سے بھی بچا لیا۔ آچاریہ ترون آریہ نے ان کا شکریہ ادا کیا۔ اسی گاؤں کی سابق سرپنچ، انجو بالا نے کہا کہ جہاں شوکت علی مبارکباد کے مستحق ہیں، وہیں پورے گاؤں کو اس کے لیے سراہا جانا چاہیے کیونکہ پورے گاؤں نے باہر کے لوگوں کے بہکاوے میں آئے بغیر امن قائم کرنے کے لیے مثبت کوششیں کیں۔‘‘

اعزاز حاصل کرنے کے بعد پرجوش شوکت علی نے بتایا کہ ’’فسادیوں نے گروکل پر دو بار حملہ کیا تھا۔ ایک بار ناکام ہونے کے بعد انہوں نے سوچا کہ ہم ہٹ جائیں گے اور ان کا راستہ صاف ہو جائے گا لیکن ہم نہیں ہٹے، ہم ڈٹے رہے اور ان کے منصوبے ناکام ہو گئے۔ انہوں نے مجھے ٹانگ میں گولی مارنے کی دھمکی دی، اس لیے اگر آپ مجھے سینے میں گولی مار دیں گے تو میں نہیں ہٹوں گا، میں مرتے دم تک گروکل کی حفاظت کروں گا۔ اس کے بعد جھگڑا ہوا اور وہاں سے چلے گئے، ہم نے پولیس کو بلانے کی بہت کوشش کی لیکن وہ جلد نہ آ سکے۔ میں گاؤں کا سرپنچ ہوں، یہاں ہماری سوسائٹی کی آبادی زیادہ ہے، میں اپنی جان دے دیتا لیکن گروکل میں پڑھنے والے بچوں کو تکلیف نہیں ہونے دیتا۔ آج مجھے سکون ہے کہ میں نے اپنے گاؤں کو جلنے سے بچایا۔‘‘