مہاراشٹر میں سیاسی سرگرمیوں کے درمیان وزیر اعلیٰ شندے سے شرد پوار کی ملاقات

مہاراشٹر میں سیاسی ہلچل کے درمیان این سی پی سربراہ شرد پوار نے ہفتہ کو وزیراعلیٰ ایکناتھ شندے سے ملاقات کی۔ دونوں رہنماؤں کے درمیان گزشتہ کچھ دنوں کے دوران یہ دوسری ملاقات تھی جو قریب نصف گھنٹے تک چلی۔ واضح ہو کہ وزیراعلیٰ ایکناتھ شندے اور نائب وزیراعلیٰ دیوندر فڑنویس کے درمیان تکرار کی خبروں سے مہاراشٹر میں سیاسی سرگرمیاں تیز ہوگئی ہیں۔

ذرائع کے مطابق دونوں رہنماؤں کے درمیان مراٹھا ریزرویشن کے سلسلے میں ہونے والی کُل جماعتی میٹنگ کو لے کر مثبت اور اہم بات چیت ہوئی۔ جانکاری کے مطابق مراٹھا ریزرویشن کے سلسلے میں آنے والے کچھ دنوں میں کُل جماعتی میٹنگ بلائی جا سکتی ہے۔ شرد اور شندے ملاقات کے بعد کُل جماعتی میٹنگ کے راستے صاف ہوگئے ہیں۔ یہ بھی بات سامنے آئی ہے کہ شرد پوار اور ایکناتھ شندے کے درمیان ترقیاتی کاموں، پونے کی موجودہ حالت اور کسانوں کے معاملوں پر بھی بات چیت ہوئی۔

قابل ذکر ہے کہ جون میں مہاراشٹر میں قانون سازیہ کے مانسون اجلاس کے پہلے دن نائب وزیراعلیٰ دیوندر فڑنویس اور ان کے سیاسی حریف ادھو ٹھاکرے کو ایک ہی لفٹ میں سواری کرتے ہوئے دیکھا گیا تھا۔ یہ واقعہ مہاراشٹر کے سیاسی حلقوں میں موضوع بحث بنا تھا اور ہر کوئی یہ اندازہ لگا رہا تھا کہ آخر ان دوست سے دشمن بنے رہنماؤں نے آپس میں کیا باتیں کی ہوں گی۔