رانچی میں سامنے آیا براڑی جیساواقعہ، ایک ہی فیملی کے 7 لوگوں نے کی خودکشی

دہلی کے براڑی میں ایک ہی فیملی کے 11 لوگوں کی خودکشی کا معاملہ ابھی مدھم بھی نہیں ہوا تھا کہ اب جھارکھنڈ میں رانچی کے اس حادثہ نے لوگوں کا دل دہلا دیا جس میں ایک ہی فیملی کے سات اشخاص نے خودکشی کر لی۔ مرنے والوں میں دو بچے بھی شامل ہیں۔

خبروں کے مطابق گودریج کمپنی میں کام کرنے والے دیپک جھا اپنی فیملی کے ساتھ کانکے تھانہ حلقہ کے بوڈیا کولڈ اسٹوریج کے پاس رہتے تھے۔ پیر کی صبح جب گھر کا دروازہ کافی دیر تک نہیں کھلا تو آس پاس کے لوگوں نے پولس کو اس کی جانکاری دی۔ موقع پر پہنچی پولس جب دروازہ توڑ کر گھر کے اندر داخل ہوئی تو کمرے میں دیپک، ان کی بیوی، دیپک کے والدین اور بچے کی لاش پڑی تھی۔ پولس نے لاشوں کو اپنے قبضے میں لے کر پوسٹ مارٹم کے لیے بھیج دیا ہے۔

مکان مالک کا کہنا ہے کہ صبح دیپک کا ایک رشتہ دار آیا تھا اور اسی نے کھڑکی سے جھانک کر دیکھا تو سبھی کو گھر کے اندر مردہ پایا۔ پڑوسیوں کا کہنا ہے کہ رات میں بھی گھر کے سبھی لوگ بخیر دیکھے گئے تھے اور کسی طرح کے جھگڑے کی آواز بھی سنائی نہیں دی تھی۔ ایس ایس پی نے بھی میڈیا سے بات چیت میں کہا کہ ابتدائی جانچ میں پتہ چلا ہے کہ سات لوگوں نے خودکشی کی ہے۔ یہ سبھی لوگ یہاں کرایہ پر رہتے تھے۔ فیملی بنیادی طور پر بہار کے بھاگلپور کی رہنے والی ہے۔

دیپک اور اس کے گھر والوں نے خودکشی جیسا قدم کیوں اٹھایا، ابھی اس سلسلے میں معلوم نہیں ہوسکا ہے۔ پولس معاملہ درج کر جانچ کر رہی ہے۔ اس سے پہلے 14 جولائی کو ہزاری باغ میں بھی ایک ہی فیملی کے 6 اراکین کی موت ہو گئی تھی۔ یہ فیملی 70 سالہ مہاویر مہیشوری کی تھی۔ حالانکہ پولس اب تک اس معاملے میں یہ واضح نہیں کر سکی ہے کہ یہ خودکشی تھی یا پھر قتل۔