تمل ناڈو میں خاتون کو حجاب اتارنے پر مجبور کرنے کے الزام میں 7 افراد گرفتار

چنئی: تمل ناڈو پولیس نے ریاست کے ویلور فورٹ کمپلیکس میں ایک خاتون کو حجاب اترانے پر مجبور کرنے کے الزام میں 7 افراد کو گرفتار کیا گیا ہے۔ گرفتار شدگان میں ایک نابالغ بھی شامل ہے۔ ویلور کے ایس پی ایس راجیش کانن گرفتاری کی تصدیق کرتے ہوئے کہا کہ 7 افراد کو دانستہ طور پر خاتون کی بے حرمتی کرنے اور بدنام کرنے کے الزام میں گرفتار کیا گیا ہے۔

ایس پی کا مزید کہنا تھا کہ ملزم نے ذاتی آزادی کے خلاف کام کیا۔ گرفتار ملزمان کی شناخت سنتوش، عمران پاشا، محمد فیصل، ابراہیم باشا، محمد فیصل اور سی پرشانت کے نام سے ہوئی ہے۔ گرفتار نابالغ کو جوینائل ہوم بھیج دیا گیا ہے۔ پولیس نے بتایا کہ گرفتار ہونے والوں میں زیادہ تر مقامی آٹو رکشہ ڈرائیور ہیں۔

پولیس کے مطابق یہ واقعہ 27 مارچ کی دوپہر کو پیش آیا جب ایک حجاب میں ملبوس خاتون اپنے ایک دوست کے ساتھ قلعہ پہنچی۔ گرفتار لوگ بھی یہاں پہنچے اور اسے حجاب اتارنے کو کہا۔ ان میں سے ایک نے اس واقعے کو فون پر شوٹ کیا اور ویڈیو سوشل میڈیا پر اپ لوڈ کر دی، جو وائرل ہوگئی۔

یہ کیس ویلور نارتھ پولیس نے بدھ کو ولیج ایڈمنسٹریٹو آفیسر (وی اے او) کی طرف سے دی گئی شکایت پر درج کیا ہے۔ پولیس نے جمعرات کو پانچ خصوصی ٹیمیں تشکیل دے کر مجرموں کو گرفتار کیا۔ سات افراد کو عوامی تحفظ کو خطرے میں ڈالنے، ذاتی آزادی کو خطرے میں ڈالنے، دو طبقوں کے لوگوں کے درمیان دشمنی پیدا کرنے اور خواتین کے وقار کو نقصان پہنچانے کے الزامات میں گرفتار کیا گیا۔

پولیس نے لوگوں کو ہدایت کی ہے کہ وہ مذکورہ ویڈیو کو سوشل میڈیا پر شیئر نہ کریں، ایسا کرنے والوں پر تمل ناڈو ہراسمنٹ آف ویمن پروہبیشن ایکٹ اور انفارمیشن ٹیکنالوجی (آئی ٹی) ایکٹ کے تحت مقدمہ درج کیا جائے گا۔ ویلور کے پولیس سپرنٹنڈنٹ نے کہا کہ معاملہ میں مزید تفتیش جاری ہے۔