یومِ آزادی کے مدنظر سیکورٹی سخت، پولیس نے چپکائی 6 موسٹ وانٹیڈ دہشت گردوں کی تصویر

یوم آزادی کے پیش نظر دہلی سے لے کر کشمیر تک سیکورٹی سخت کر دی گئی ہے۔ دہلی میں لال قلعہ کے آس پاس کثیر تعداد میں سیکورٹی فورسز کو تعینات کر دیا گیا ہے اور سب سے دلچسپ بات یہ ہے کہ دہلی پولیس نے لال قلعہ کے آس پاس موسٹ وانٹیڈ دہشت گردوں کی تصویر پر مبنی پوسٹر چپکا دیئے ہیں۔ اس پوسٹر میں چھ دہشت گردوں کی تصویر لگی ہوئی ہے۔ پوسٹر میں شامل کی گئیں دہشت گردوں کی تصویر کے ساتھ ساتھ ان کا نام اور پتہ بھی درج کیا گیا ہے۔

دہلی پولیس نے موسٹ وانٹیڈ دہشت گردوں کی تصویر پر مبنی پوسٹر چسپاں کرنے کے ساتھ یہ اپیل بھی کی ہے کہ اگر کوئی بھی شخص ملک میں ان دہشت گردوں کو دیکھتا ہے تو فوراً پولیس کو مطلع کرے۔ پولیس نے دعویٰ کیا ہے کہ یہ سبھی چھ دہشت گرد القاعدہ سے تعلق رکھتے ہیں اور ان کا مقصد ہندوستان میں دہشت گردانہ سرگرمیوں کو انجام دینا ہے۔ یوم آزادی کے موقع پر یہ سبھی دہشت گرد نہ صرف دہلی بلکہ پورے ملک میں دہشت گردانہ حملہ کر کے بدامنی پھیلانا چاہتے ہیں۔ ان کا مقصد ماحول کو خراب کرنا اور لوگوں میں ڈر کا ماحول پیدا کرنا ہے۔

دراصل خفیہ ایجنسیوں کو ایسی جانکاری ملی ہے کہ کسان تحریک کی آڑ میں کچھ شرپسند راجدھانی میں 26 جنوری جیسی حرکت کو انجام دینے کی کوشش کر سکتے ہیں۔ یہ بات بھی سامنے آئی ہے کہ دہشت گرد تنظیم ڈرون کا استعمال بھی کر سکتی ہیں۔ یہی وجہ ہے کہ دہلی پولیس کمشنر نے پہلے ہی ڈرون اڑانے پر پابندی عائد کر رکھی ہے۔