شوہرکو سابق بیوی کی انسٹا ریل دیکھنا مہنگا پڑا

ایک شخص اپنی سابقہ ​​بیوی کی انسٹا ریل دیکھ  رہا تھا اورا س کو یہ دیکھنا بہت مہنگا پڑا۔اس کی وجہ سے اس کی دوسری بیوی اس قدر ناراض ہوئی کہ اس نے بلیڈ سے اپنے شوہر کی شرمگاہ کاٹ دی۔نیو ز پورٹل ’اے بی پی‘ پر شائع خبر کے مطابق  یہ چونکا دینے والا واقعہ آندھرا پردیش کے این ٹی آر ضلع کا ہے۔ واقعے کے بعد اہل خانہ اس شخص کو اسپتال لے گئے جہاں اس کی حالت مستحکم بتائی جاتی ہے۔

ٹائمز آف انڈیا نے پولیس کے حوالے سے بتایا کہ متاثرہ آنند بابو (26) کی 6 سال قبل شادی ہوئی تھی تاہم اکثر جھگڑے کے بعد وہ اپنی بیوی سے الگ ہو گیا۔ چار سال پہلے اس نے ورما نامی عورت سے شادی کی تھی۔ تب سے، دونوں این ٹی آر ضلع کے مپلا گاؤں میں رہتے ہیں اور یومیہ اجرت پر کام کر کے اپنی روزی کماتے ہیں۔

22 جولائی کی صبح ورما نے دیکھا کہ اس کے شوہر آنند بابو موبائل میں مصروف ہیں۔ اس نے قریب جا کر دیکھا کہ شوہر انسٹاگرام پر اپنی سابقہ ​​بیوی کی ویڈیو دیکھ رہا ہے۔ یہ دیکھ کر ورما کا غصہ بڑھ گیا اور اس کے بعد میاں بیوی کے درمیان گرما گرم بحث شروع ہو گئی جو لڑائی تک پہنچ گئی۔ مشتعل بیوی نے شوہر پر بلیڈ سے حملہ کر کے اس کا پرائیویٹ پارٹ کاٹ دیا۔

چیخ و پکار سن کر آس پاس کے لوگ پہنچے اور دیکھا کہ آنند کے جسم سے بہت خون بہہ رہا تھا۔ اسے فوری طور پر نندیگام سرکاری اسپتال لے جایا گیا اور بعد میں علاج کے لیے وجئے واڑہ ریفر کردیا گیا۔ ڈاکٹروں نے بتایا کہ آنند کے پرائیویٹ پارٹ پر گہرا زخم ہے۔ ڈاکٹروں نے کٹے ہوئے حصے کو ٹانکے لگا کر جوڑ دیا ہے۔ حالت مستحکم ہونے پر انہیں ہسپتال سے فارغ کر دیا گیا۔