نتیش حکومت کو اسکولی بچوں کی بھی نہیں پرواہ، خوف کے سائے میں گزارنی پڑی رات

25 ستمبر کی رات جب سیاسی لیڈران اور اعلیٰ افسران اپنے اپنے گھروں میں آرام کی نیند سو رہے ہوں گے اس وقت کچھ اسکولی بچے کھلے آسمان کے نیچے، سڑک پر رات گزارنے کے لیے مجبور تھے۔ انھوں نے سڑک پر ہی کھانا کھایا اور آتی جاتی تیز رفتار گاڑیوں کی آواز، مچھروں کے کاٹنے اور آوارہ کتوں کے خوف کے سائے میں سو گئے۔ یہ اسکولی بچے دراصل نتیش حکومت کے خاص منصوبہ ’مکھیہ منتری بہار درشن یوجنا‘ کے تحت گھومنے نکلے تھے جن کی بس راستے میں ہی خراب ہو گئی۔ حیرانی کی بات یہ ہے کہ نظم و نسق اور اسکولی طلبا کے لیے ہر طرح کے وسائل مہیا کرانے کا دعویٰ کرنے والی بہار حکومت ان بچوں کے لیے کوئی انتظام نہیں کر سکی۔

خبروں کے مطابق چمپارن ضلع کے اسکولی بچے کل اپنے اساتذہ کے ساتھ تاریخی مقامات کے ساتھ ساتھ چڑیا گھر کی سیر کرنے پٹنہ آئے تھے۔ اس کے لیے نتیش حکومت نے اسکول کو رقم مہیا کرائی تھی۔ ایک خبر رساں ادارہ کے مطابق بس خراب ہو جانے کی وجہ سے بچوں کی واپسی کا انتظام نہیں ہو سکا اور انھیں سڑک کنارے فٹ پاتھ پر ہی رات گزارنی پڑی۔ بچوں کے ساتھ ساتھ ان کی دیکھ ریکھ کرنے والی خاتون اساتذہ بھی فٹ پاتھ پر ہی سونے کے لیے مجبور ہوئیں۔ ان سب نےچڑیا گھر کے پاس ہی رات گزاری لیکن آس پاس سرکاری بنگلوں میں سرکاری لیڈران اور افسران اس سے بے خبر رہے۔

اس معاملہ کے منظر عام پر آنے کے بعد ریاست کے وزیر تعلیم کرشن نندن ورما نے ناراضگی ظاہر کرتے ہوئے متعلقہ ضلع کے ڈی ای او سے پورے واقعہ کی تفصیلی رپورٹ بھیجنے کا حکم صادر کر دیا ہے، لیکن بچوں اور ان کے ساتھ آئیں خاتون اساتذہ کو جس مشکل کا سامنا کرنا پڑا وہ یقیناً کبھی بھلا نہیں پائیں گی۔ کرشن نندن ورمانے اس سلسلے میں میڈیا سے بات کرتے ہوئے کہا کہ ’’زیادہ تر گھومنے نکلے بچے اسی دن واپس لوٹ جاتے ہیں۔ آخر اس اسکول کے بچوں کو رات بھر کھلے آسمان کے نیچے کیوں سلایا گیا۔ اس معاملے میں جانچ کے بعد جو لوگ بھی قصورار ہوں گے ان کے خلاف سخت کارروائی کی جائے گی۔‘‘

آر جے ڈی لیڈر مرتیونجے تیواری نے اس واقعہ کے تعلق سے اپنا رد عمل ظاہر کرتے ہوئے نتیش حکومت کو تنقید کا نشانہ بنایا۔ انھوں نے کہا کہ ’’جو کچھ ہوا وہ حکومت کی بے حسی کا عروج ہے۔ بہار میں آخر یہ ہو کیا رہا ہے... حکومت اقتدار کی بارگیننگ میں اس طرح مصروف ہے کہ ننھے منے اسکولی بچوں کو لا کر روڈ پر چھوڑ دیا گیا۔ یہ حکومت کے لیے چلّو بھر پانی میں ڈوب مرنے والی حالت ہے۔‘‘ وہ مزید کہتے ہیں کہ ’’اگر بہار سنبھل نہیں رہا ہے، حکومت چلانے میں دل نہیں لگ رہا ہے یا اگر بی جے پی کے دباؤ میں ہیں تو وزیر اعلیٰ جی کو استعفیٰ دے دینا چاہیے۔‘‘