بھارتیہ جنتا پارٹی یوا مورچہ کے ضلع صدر کے خلاف ایس سی-ایس ٹی کے تحت معاملہ درج

حصار: ہریانہ میں بھارتیہ جنتا پارٹی یوا مورچہ کے حصار ضلع صدر ارون دت شرما کے خلاف ذات پات کی بنیا د پر گالیاں دینے اور مارپیٹ کے الزام میں مل گیٹ تھانہ پولیس نے مختلف دفعات کے تحت معاملہ درج کیا ہے۔

پولیس نے جمعرات کے روز بتایا کہ معاملہ کوشک نگر کے رہنے والے سبھاش چندر کی شکایت پر درج کیا گیا ہے جنہوں نے اپنی شکایت میں الزام عائد کیا تھا کہ منگل کی شام 4 بجے مرزا چوک کے نزدیک واقع مندر کے باہر بھارتیہ جنتا یوا مورچہ کے ضلع صدر گاؤں بالسمند سے تعلق رکھنے والے ارون دت شرما نے انہیں ذات پات کی بنیاد پر گالیاں دیں اور مخالفت کرنے پر مارپیٹ کی۔

مل گیٹ تھانہ پولیس نے سبھاش چندر کی شکایت پر ارون دت شرما کے خلاف دفعہ 323 اور ایس سی-ایس ٹی ایکٹ کی دفعات کے تحت معاملہ درج کر لیا ہے۔ دوسری طرف ارون دت شرما نے رابطہ کرنے پر الزام عائد کیا کہ شكایت کنندہ ان کی زمین پر قبضہ کرنے کی کوشش میں ہے اور منگل کو شکایت کنندہ نے ان کے ساتھ بدتمیزی کی تھی جس کی شکایت انہوں نے پولیس میں کی تھی لیکن پولیس نے ان کی شکایت پر معاملہ درج نہیں کیا۔

معا ملے میں تفتیش کر نے والے پولیس ڈپٹی سپرنٹنڈنٹ اشوک کمار نے کہا کہ ابھی دونوں فریقوں سے بات کی جانی ہے۔ جانچ کرنے کے بعد ہی معاملے میں کچھ کہا جا سکتا ہے۔