سید شبلی منظور ہاویری سیٹ کے کانگریس مبصر مقرر، 'کرناٹک میں بی جے پی کے لیے 40 سیٹیں چھوڑی جائیں گی'

نئی دہلی: کرناٹک کے انتخابات ملک کے لیے اہم ہیں اور یہ انتخاب بی جے پی کی من مانی، عوام ،غریب دشمن اور غلط پالیسیوں کی وجہ سے اس کے زوال کا آغاز ثابت ہوگا۔ یہ بات کانگریسی لیڈراور سابق نائب صدر کم آرگنائزیشن انچارج، بہار اقلیتی کانگریس سید شبلی منظور نے کرناٹک کے ہاویری اسمبلی حلقہ کے مبصر مقرر کئے جانے کے موقع پر کہی۔

انہوں نے کہا کہ بھارتیہ جنتا پارٹی کی 40 فیصد کمیشن والی حکومت نے اپنے دور حکومت میں عوام کے دکھوں کو نظر انداز کر کے انہیں پریشانی میں ڈال دیا ہے اور اپنی ساری توجہ لوٹ کھسوٹ پر مبذول کی۔ انہوں نے کہا کہ وہ جلد ہی ریاست کرناٹک کا دورہ کریں گے اور مذکورہ اسمبلی انتخابات میں کامیابی کو یقینی بنانے کے لئے کانگریس امیدواروں، ریاستی اور ضلعی عہدیداروں اور کارکنوں کے ساتھ تال میل قائم کرکے اپنا کردار ادا کریں گے۔

واضح رہے کہ شبلی منظور کو آل انڈیا کانگریس کمیٹی اقلیتی محکمہ نے کرناٹک اسمبلی انتخابات 2023 کے بہتر انتظام کے لیے کرناٹک کے ہاویریاسمبلی حلقہ کے مبصرکی ذمہ داری سونپی ہے۔ اس موقع پر شبلی منظور نے اعلیٰ قیادت بالخصوص اقلیتی محکمہ کے قومی صدر، راجیہ سبھا ممبر پارلیمنٹ جناب عمران پرتاپ گڑھی کا یہ اہم ذمہ داری دینے پر شکریہ ادا کیا اور یقین دلایا کہ وہ اپنی ذمہ داری پوری ایمانداری اور محنت کے ساتھ نبھائیں گے۔

(یو این آئی ان پٹ کے ساتھ)