خواتین کی ذاتی جانکاریاں اسلامی ممالک کو بھیجنے کی دھمکی دینے والا ہیکر سنجے سونی راجستھان میں گرفتار

ایس او جی (اسپیشل آپریشن گروپ) نے راجستھان سے اس ملزم کو گرفتار کر لیا ہے جس نے آن لائن لیڈیز انڈر گارمنٹس سپلائی کرنے والی کمپنی سے 15 لاکھ خواتین کی ذاتی جانکاریاں چرا کر اسلامی ممالک میں فروخت کرنے کی دھمکی دی اور کمپنی کو بلیک میل کیا۔ بتایا جاتا ہے کہ ملزم سنجے سونی ادے پور کا رہنے والا ہے اور اس نے کچھ دیگر ہیکرس کے ساتھ مل کر گارمنٹس کمپنی سے جڑی خواتین کی ذاتی جانکاریاں، مثلاً ان کے نام، موبائل نمبر، ای میل، تاریخ پیدائش اور سائز تک چرا لی۔ بعد ازاں ادے پور میں بیٹھے ملزم نے کمپنی کو بلیک میل کر کے پیسے بھی ہضم کر لیے تھے۔

اس تعلق سے انکشاف ’اے بی پی نیوز‘ نے کیا ہے۔ اس کی رپورٹ میں بتایا گیا ہے کہ ایس او جی ایڈیشنل ڈائریکٹر جنرل اشوک راٹھوڑ کی مانیٹرنگ میں کارروائی کی گئی ہے۔ اس سلسلے میں انڈرگارمنٹس کمپنی کے عہدیدار امیش وجئے نے ایس او جی میں رپورٹ دی کہ ان کی کمپنی سے 92 لاکھ کسٹمر جڑے ہوئے ہیں۔ 24 اپریل کو ان کی کمپنی کو کسی ہیکر نے ای میل کیا کہ آپ کے سروَر کو ایک ٹوئٹر ہینڈل سے ٹوئٹ کیا گیا کہ 15 لاکھ ہندو لڑکیوں کا ڈاٹا اسلامی ممالک میں بھیجا جا رہا ہے۔

رپورٹ کے مطابق 25 مئی کو پھر ہیکر نے کمپنی کو ای میل بھیج کر سسٹم کی کمزوری بتاتے ہوئے پیسے کی ڈیمانڈ کی۔ اگلے دن کمپنی سے بھیجے گئے ای میل کو بھی ٹوئٹ کر دیا۔ اس درمیان اسی ٹوئٹر صارف نے ریلوے کے گاہکوں کے بارے میں لکھا کہ ہندو لڑکیوں کا ڈاٹا اسلامک ممالک کو بھیجا جا رہا ہے۔ ریلوے نے بے توجہی دکھائی تو ملزم نے ویڈیو بنا کر وائرل کرنے کی بات کہی۔

اے بی پی نیوز کے مطابق کمپنی نے رپورٹ میں الزام لگایا کہ ملزم گاہکوں کے ڈاٹا کو ہندو لڑکیوں کا ڈاٹا بتا کر اسلامی ممالک میں بھیجنے کی بات کہہ کر فرقہ وارانہ خیر سگالی بگاڑنے کی کوشش کر رہا ہے۔ اس واقعہ کی جانچ انسپکٹر پونم چودھری کر رہی ہیں۔ ملزم ہندو خواتین کو محتاط رہنے کا مشورہ دے رہا تھا تبھی اکاؤنٹ کی جانچ کرتی ہوئی ایس او جی ٹیم نے تکنیکی بنیاد پر ملزم کی شناخت کر کے اسے پکڑ لیا۔ ملزم اپنے اکاؤنٹ پر خود کو نیشنلسٹ بتا کر دن بھر متنازعہ پوسٹ شیئر کیا کرتا تھا۔