وزیر کی بیٹی کی کتاب: مودی کی تعریف، یوگی کی فضیحت

لکھنؤ۔ بی ایس پی (بہوجن سماج پارٹی) کو چھوڑ کربی جے پی کا دامن تھامنے والے سوامی پرساد موریہ اب اتر پردیش کی موجودہ حکومت میں وزیر ہیں۔ ان کی بیٹی سنگھ مترا موریہ نے وزیر اعظم نریندر مودی کی کامیابی کی کہانی بتانے کے لئے ’مودی ازم کےمعنی‘ نامی ایک کتاب تصنیف کی ہے ۔ کتاب میں انہوں نے مودی کی تو تعریف کی ہے لیکن یوگی آدتیہ ناتھ کا کچھ اس طرح سے تذکرہ کیا گیا ہے جو ان کو زیادہ پسند نہیں آئے گا۔ کتاب کی تصنیف سنگھ مترا اور جون پور کے ایک صحافی دیپک کے ایس نے مشترکہ طور پر کی ہے۔ دراصل کتاب میں یوگی آدتیہ ناتھ سے جڑے جن واقعات کا حوالہ دیا گیا ہے وہ ان کی کٹر ہندو وادی شبیہ کو ہوا دیتی ہے۔

سنگھ مترا کی کتاب میں یوگی آدتیہ ناتھ کے گورکھپور سے رکن پارلیمنٹ منتخب کئے جانے سے لے کر ان کے وزیر اعلیٰ کے عہدے تک پہنچے اور یوگی کے بیانوں کو درج کیا گیا ہے۔ جیسے ’’ ملک کی ہر مسجد میں ہندو دیوی دیوتاؤں کی مورتیاں ہوں گی‘‘۔ اخبار کی ایک رپورٹ کے مطابق کتاب میں یوگی آدتیہ ناتھ کا وہ بیان بھی درج ہے جو انہوں نے دادری سانحہ میں محمد اخلاق کو بیف کھانے کے الزام میں پیٹ پیٹ کر قتل کئے جانے کے بعد دیا تھا۔

کتاب میں ایسے کئی بیانات درج ہیں ۔ ایک جگہ درج ہے ،’’ جو یوگا کی مخالفت کر رہے ہیں انہیں ہندوستان چھوڑ دینا چاہئے ‘‘ اور یہ بھی ’’ جو سوریہ نمسکار کی مخالفت کر رہے ہیں انہیں سمندر میں سمادھی لے لینی چاہئے۔ ملک کی آبادی بہت تیزی سے بڑھ رہی ہے، اس کے ذمہ دار مسلمان ہیں جو زیادہ بچے پیدا کر رہے ہیں‘‘ وغیرہ وغیرہ۔

سنگھ مترا نے کتاب میں یوگی کو صلاح بھی دی ہے کہ ’’انہیں اپنے جذبات پر قابو رکھنا چاہئے کیوں کہ اب وہ وزیر اعلیٰ ہیں ۔ یوگی کو صوبے میں بہتر حکمرانی پیش کرنی چاہئے۔‘‘

واضح رہے کہ کتاب ’’مودی ازم کے معنی ‘‘ کا اجرا لکھنؤ میں اتر پردیش کے گورنر رام نائیک کے ہاتھوں ہوا تھا۔ گورنر نے اپنے خطاب میں کہا تھا کہ وہ کتاب کے عنوان سے اتنے متاثر ہوئے ہیں کہ وہ یہاں آنے سے خود کو روک نہیں پائے ۔