سماجوادی پارٹی نے رامپور پارلیمانی سیٹ سے عاصم رضا کو بنایا امیدوار، مقابلہ ہوا دلچسپ

سماجوادی پارٹی نے 6 جون کو رامپور اور اعظم گڑھ لوک سبھا سیٹوں کے لیے ہونے والے ضمنی انتخابات کے پیش نظر اپنے امیدواروں کے ناموں کا اعلان کر دیا ہے۔ کافی کشمکش کے بعد رامپور سیٹ سے جہاں اعظم خان کے قریبی عاصم رضا کو امیدوار بنایا گیا، وہیں اعظم گڑھ سے دھرمیندر یادو نے پرچہ نامزدگی داخل کیا ہے۔ ان دونوں امیدواروں کے کھڑا ہونے سے دونوں ہی سیٹوں پر مقابلہ کافی دلچسپ ہو گیا ہے۔

رامپور سیٹ سے بی جے پی نے اعظم خان کے قریبی رہے گھنشیام سنگھ لودھی کو امیدوار بنایا ہے جو جنوری 2022 میں ہی سماجوادی پارٹی چھوڑ کر بی جے پی میں شامل ہوئے۔ ایسا امکان ظاہر کیا جا رہا تھا کہ اعظم خان کی قربت کا فائدہ گھنشیام سنگھ لودھی کو ملے گا، لیکن جس طرح سے اعظم خان نے خود سماجوادی پارٹی امیدوار عاصم رضا کے نام کا اعلان کیا، اور انھیں اپنا انتہائی قریبی و تجربہ کار سیاست داں بتاتے ہوئے عوام سے عاصم کی جیت یقینی بنانے کی اپیل کی، ظاہر ہے کہ اعظم کے چاہنے والے گھنشیام سنگھ سے دور ہی رہیں گے۔ گویا کہ بی جے پی کو رامپور لوک سبھا سیٹ پر جیت آسانی سے ملنے والی نہیں ہے۔

کچھ یہی حالت اعظم گڑھ لوک سبھا سیٹ پر ہونے والے ضمنی انتخاب کو لے کر بھی ہے۔ بی جے پی نے دنیش لال یادو نہروا کو اپنا امیدوار بنایا ہے جب کہ بی ایس پی نے گڈو جمالی کو میدان میں اتارا ہے۔ سیفئی فیملی سے تعلق رکھنے والے دھرمیندر یادو نے سماجوادی پارٹی کی طرف سے پرچہ نامزدگی داخل کر دیا ہے اور امید ظاہر کی جا رہی ہے کہ بی جے پی اور سماجوادی پارٹی کے درمیان سخت مقابلہ ہوگا۔

اس درمیان کانگریس نے یوپی ضمنی انتخابات میں اپنے امیدوار اتارنے سے انکار کر دیا ہے۔ ریاستی کانگریس کی جانب سے ایک بیان جاری کیا گیا ہے جس میں کہا گیا ہے کہ کانگریس رامپور اور اعظم گڑھ پارلیمانی سیٹ پر ہونے والے ضمنی انتخاب میں حصہ نہیں لے گی کیونکہ اسمبلی انتخاب میں پارٹی کی کارکردگی اچھی نہیں رہی تھی۔ اسے دیکھتے ہوئے کانگریس خود کی تشکیل نو پر دھیان دے رہی ہے جس سے کہ 2024 کے لوک سبھا انتخاب میں خود کو ایک مضبوط متبادل کی شکل میں پیش کر سکے۔

بہر حال، رامپور اور اعظم گڑھ دونوں ہی سیٹوں پر سماجوادی پارٹی کو امیدواروں کا نام اعلان کرنے میں کافی مشقتوں کا سامنا کرنا پڑا۔ رامپور سے اعظم خان کی بیوی تزئین فاطمہ یا بہو سدریٰ کو کھڑا کیے جانے کا امکان ظاہر کیا جا رہا تھا۔ پھر بعد میں تزئین فاطمہ کو کھڑا کیے جانے پر زور دیا گیا، اور عاصم رضا نے تو دو پرچہ لیا بھی تھا، ایک اپنے نام سے اور ایک تزئین فاطمہ کے نام سے۔ بعد میں تزئین فاطمہ نے اپنی خرابیٔ صحت کی وجہ سے انتخاب نہ لڑنے کی خواہش ظاہر کی۔ بالآخر عاصم رضا نے بطور سماجوادی پارٹی امیدوار پرچہ نامزدگی داخل کر دیا۔