سہارا کے سربراہ سبرت رائے کی آخری رسومات جمعرات کو لکھنؤ میں ہوں گی ادا

لکھنؤ: ملک کے معروف کاروباری گروپ ’سہارا انڈیا پریوار‘ کے سربراہ سبرت رائے سہارا کی آخری رسومات کی ادائیگی جمعرات کو لکھنؤ میں کی جائیں گی۔ سبرت رائے کا منگل کی دیر رات ممبئی کے ایک اسپتال میں حرکت قلب بند ہو جانے سے انتقال ہو گیا تھا۔ ادارے کے ذرائع کے مطابق رائے کی میت بدھ کی دوپہر ممبئی سے یہاں لائی جائے گی۔ سہارا شہر میں ان کے جسد خاکی کو آخری دیدار کے لئے رکھا جائے گا۔ ان کی آخری رسومات کی ادائیگی بیکونٹھ دھام میں کی جائیں گی۔

قابل ذکر ہے کہ سہارا گروپ کے بانی سبرت رائے لمبے عرصے سے علیل چل رہے تھے۔ وہ بلڈ پریشر اور ہائیپرٹنشن کے علاوہ کئی دیگر بیماریوں سے متاثر تھے۔ 12 نومبر کو طبیعت بگڑنے پر انہیں ممبئی کے کوکیلا بین دھیروبھائی امبانی اسپتال اور میڈیکل ریسرچ انسٹی ٹیوٹ میں داخل کرایا گیا تھا۔

بہار کے ارریہ ضلع میں 10 جون 1948 کو پیدا ہوئے رائے نے سہارا گروپ کا آغاز 1978 میں گورکھپور میں کیا تھا۔ مائیکرو فنانس کے شعبے میں تقریباً چار دہائیوں تک ان کا دبدبہ رہا۔ اس دوران سہارا گروپ کا کاروبار ملک بیرون ملک میں پھیلا اور رئیل اسٹیٹ، فائنانس، میڈیا، انٹرٹینمنٹ، ہیلتھ کیئر، ہاسپیٹیلٹی، ریٹیل، انفارمیشن ٹیکنالوجی تک میں سہارا گروپ کی چمک پھیلی۔