فیس بک-واٹس ایپ پر آر ایس ایس-بی جے پی کا قبضہ، فرضی خبر پھیلاتے ہیں: راہل گاندھی

کانگریس کے سابق صدر راہل گاندھی نے بی جے پی اور آر ایس ایس پر حملہ بولا ہے۔ انہوں نے کہا کہ بی جے پی، آر ایس ایس ہندوستان کا فیس بک اور واٹس ایپ ہر قبضہ ہے اور وہ ان کے ذریعے فرضی خبریں اور نفرت پھیلاتے ہیں۔

راہل گاندھی نے ایک اخبار کی رپورٹ کا حوالہ دیتے ہوئے کہا، ’’بی جے پی اور آر ایس ایس کا ہندوستان میں فیس بک اور واٹس ایپ پر قبضہ ہے۔ وہ اس کے ذریعے فیک نیوز اور نفرت پھیلانے کا کام کرتے ہیں۔ وہ اس کا استعمال ووٹروں کو متاثر کرنے کے لئے کرتے ہیں۔‘‘

دراصل، فیس بک کے ملازمین کے حوالہ سے رپورٹ میں کہا گیا ہے کہ ہندوستان میں کئی ایسے لوگ ہیں جو سوشل میڈیا پلیٹ فارم پر نفرت پھیلاتے ہیں۔ ملازمین کا کہنا ہے کہ ورچوئل دنیا پر نفرت پھیلانے والی پوسٹوں سے اصل دنیا میں کشیدگی اور تشدد پھیلتا ہے۔

واضح رہے کہ بی جے پی کے لیڈر ٹی راجا نے اپنی فیس بک پوسٹ پر لکھا تھا کہ روہنگیا مسلمانوں کو گولی مار دینی چاہیے، مسلمان ملک دشمن ہوتے ہیں اور مسجدوں کو گرا دینا چاہیے۔ اس پوسٹ کی رپورٹ ہونے پر فیس بک کے ملازمین نے اسے کمپنی کے اصولوں کے خلاف مانا اور پوسٹ پر ایکشن لینا چاہا لیکن کمپنی کے ہندوستان میں موجود ایک عہدیدار نے ایسا کرنے سے منع کر دیا۔ اس واقع کی بنا پر فیس بک کی غیر جانبداری پر سوال اٹھائے جا رہے ہیں۔